Yevropadagi jazirama don bozoriga 2 milliard yevrodan ortiq zarar yetkazdi

Yevropada iyun oyida kuzatilgan anomal jazirama don hosiliga jiddiy zarar yetkazdi. Financial Times nashrining Yevropa qishloq xo‘jaligi bozori ishtirokchilari manfaatlarini himoya qiluvchi Coceral assotsiatsiyasi hamda iqlim o‘zgarishi masalalari bilan shug‘ullanuvchi ECIU tahlil markazi ma’lumotlariga tayanib xabar berishicha, qariyb 9 million tonna don hosili yo‘qotilgan.

 

Nashr qayd etishicha, buning oqibatida Yevropa Ittifoqi va Buyuk Britaniyada don hosili bo‘yicha prognozlar sezilarli darajada pasaytirilgan. Yetkazilgan iqtisodiy zarar 2 milliard yevrodan oshgan.

 

Eng katta yo‘qotish Fransiyada qayd etilgan. Mamlakatda don hosili prognozi 4,1 million tonnaga qisqartirilgan bo‘lib, bu qariyb 891 million yevro zarar sifatida baholanmoqda. Eng ko‘p zarar ko‘rgan ikkinchi davlat Vengriya bo‘lib, u yerda hosil yo‘qotishlari 2,4 million tonnani tashkil etgan.

 

Fransiyalik fermerlarning ma’lum qilishicha, ayrim ekinlar, xususan, soya hosili 50–70 foizgacha kamayishi kutilmoqda.

 

“Biz falokat tomon ketayotganimiz yo‘q, biz allaqachon uning ichidamiz”, — dedi Fransiyaning sharqidagi organik fermer xo‘jaligi egasi Benua Merlo.

 

Tahlilchilarga ko‘ra, chorvachilik uchun asosiy ozuqa hisoblangan makkajo‘xori hosilining qisqarishi Braziliya va Ukraina kabi davlatlardan import hajmining oshishiga olib kelishi mumkin. 

 

Shuningdek, Fransiyada bug‘doy hosilining kamayishi ushbu mamlakatning Afrika davlatlariga bug‘doy eksporti qisqarishiga sabab bo‘lishi kutilmoqda.