Al-Aqso masjidiga 4 mingdan ortiq isroillik bostirib kirdi

Falastinning Quddus gubernatorligi ma’lumotiga ko‘ra, 23-iyul kuni bosib olingan Sharqiy Quddusdagi Al-Aqso masjidi majmuasiga 4 288 nafar isroillik ko‘chmanchi va o‘ta o‘ng qanot guruhlari a’zolari kirgan. Kun yakuniga qadar ularning soni 5 ming nafarga yetishi mumkinligi qayd etilgan. Bu haqda Al Jazeera xabar berdi.

 

Ular orasida Isroil milliy xavfsizlik vaziri Itamar Ben-Gvir ham bo‘lib, u hududga kuchaytirilgan politsiya qo‘riqlovi ostida kirgan. Tashrif yahudiylarning Tisha B’Av motam kuni munosabati bilan amalga oshirilgan.

 

Falastin rasmiylari Isroil xavfsizlik kuchlari Al-Aqso majmuasi darvozalarida qat’iy cheklovlar joriy etgani, ko‘plab falastinlik ibodatchilar va talabalarni hududga kiritmagani hamda ayrimlarga nisbatan kuch ishlatganini bildirdi.

 

Quddus gubernatorligi ma’lumotiga ko‘ra, majmua ichida ayrim isroilliklar Talmud marosimlarini o‘tkazib, sajda qilgan, qo‘shiq kuylagan va ibodat qilgan. Isroil OAV esa politsiya ming nafardan ortiq yahudiyga hududda ibodat qilishga ruxsat berganini yozdi.

 

1967-yilda o‘rnatilgan status-kvoga muvofiq, musulmon bo‘lmaganlarga Al-Aqso majmuasiga tashrif buyurishga ruxsat beriladi, biroq u yerda ibodat qilish taqiqlanadi.

 

Ben-Gvir Tisha B’Av munosabati bilan qilgan tashrifi chog‘ida yahudiylar ushbu hududda o‘zlarini "egalaridek his qilayotgani"ni aytib, bu boradagi vaziyatni "katta yutuq" deb baholadi.

 

Falastin prezidenti ma’muriyati va Tashqi ishlar vazirligi bu harakatlarni xalqaro huquqning buzilishi hamda Al-Aqso majmuasining tarixiy va huquqiy maqomini o‘zgartirishga qaratilgan xavfli keskinlashuv sifatida baholadi.

 

HAMAS harakati ham reydlarni qoralab, bunday harakatlar oqibatsiz qolmasligini bildirdi. Iordaniya Tashqi ishlar vazirligi esa Ben-Gvirning tashrifini "masjid muqaddasligining tahqirlanishi, keskinlashuv va qabul qilib bo‘lmaydigan provokatsiya" deb atab, xalqaro hamjamiyatni Isroilga bosim o‘tkazishga chaqirdi.