Hindistondagi suv toshqinlari oqibatida 40 dan ortiq odam halok bo‘ldi

Hindistonning shimoli-sharqidagi Assam shtatida iyun oyidan buyon davom etayotgan musson yomg‘irlari oqibatida yuzaga kelgan suv toshqinlari kamida 41 kishining hayotiga zomin bo‘ldi. Bu haqda shtat bosh vaziri Himanta Bisva Sarmaga tayanib, Arab News xabar berdi.

 

Uning so‘zlariga ko‘ra, suv toshqinlari oqibatida minglab chorva mollari nobud bo‘lgan. Yuqori oqim hududlarida kuzatilgan jala yog‘inlari hamda ayrim joylarda me’yordan 436 foizga ko‘p yog‘gan yomg‘ir qator qishloqlarda misli ko‘rilmagan talafotlarni keltirib chiqargan.

 

Rasmiy ma’lumotlarga ko‘ra, suv toshqinlari 1 800 dan ortiq qishloqdagi qariyb 900 ming aholiga ta’sir ko‘rsatgan. Shtat bo‘ylab 150 ga yaqin vaqtinchalik boshpana tashkil etilib, ularda 30 mingga yaqin kishi joylashtirilgan.

 

Qidiruv-qutqaruv ishlariga Hindiston harbiy-havo kuchlari, shtat va milliy favqulodda vaziyatlarga javob berish xizmatlari jalb etilgan. Yordam yuklarini chekka hududlarga yetkazish uchun yuk tashuvchi dronlar va 50 dan ortiq kichik qayiqdan foydalanilmoqda. 

 

Shuningdek, harbiy aviatsiya yetib borish qiyin bo‘lgan hududlarga gumanitar yuklarni havo orqali tashlamoqda.

 

Mutaxassislarning ta’kidlashicha, musson mavsumida kuzatiladigan bunday tabiiy ofatlar Hindistonda har yili takrorlanadi. Biroq iqlim o‘zgarishi va urbanizatsiya ularning soni hamda ko‘lamini yanada kuchaytirmoqda.