Hindistondagi tunnel qulashi oqibatida 20 kishi halok bo‘ldi
Tunnelning qulashiga metan gazining portlashi sabab bo‘lgan bo‘lishi mumkinligi taxmin qilinmoqda.
Hindistonning Sikkim shtatida qurilayotgan gidroelektr stansiyasi tunnelida yuz bergan fojia oqibatida halok bo‘lganlar soni 20 nafarga yetdi.
The Times of India nashri xabariga ko‘ra, qutqaruvchilar tunnel ostidan 20 nafar ishchining jasadini olib chiqqan. Ulardan 13 nafarining shaxsi aniqlangan.
Dastlabki ma’lumotlarga ko‘ra, tunnel ichida 27 kishi bo‘lgan. Ulardan 2 nafari omon chiqishga muvaffaq bo‘lgan, yana 5 nafar bedarak yo‘qolgan ishchini qidirish ishlari davom etmoqda.
Qutqaruv operatsiyasi tunnel ichida gaz to‘planib qolgani sabab murakkablashmoqda. Mutaxassislar hodisaga metan gazining sizib chiqishi va portlashi sabab bo‘lgan bo‘lishi mumkinligini taxmin qilmoqda.
Voqea Hindiston Milliy gidroelektr kompaniyasi (NHPC) tomonidan barpo etilayotgan 7 kilometrlik tunnelda sodir bo‘lgan. Qurbonlar orasida kompaniyaning yuqori lavozimli xodimlaridan biri ham bor.
Mahalliy hokimiyat hodisa yuzasidan maxsus ekspertlar guruhi tomonidan keng qamrovli tergov o‘tkazilishini ma’lum qildi.
