O‘zbekistonda ijtimoiy ish faoliyatini tartibga soluvchi qonun qabul qilindi
Hujjat ijtimoiy xizmatlar va yordam ko‘rsatish tizimini takomillashtirish hamda ushbu sohadagi vakolatli organlar faoliyatini belgilaydi.
23-iyul kuni “Ijtimoiy ish to‘g‘risida”gi qonun (O‘RQ–1159-son) qabul qilindi. Qonunning asosiy maqsadi ijtimoiy ish sohasidagi munosabatlarni huquqiy jihatdan tartibga solishdan iborat. Bu haqda "Huquqiy axborot" Telegram-kanali xabar berdi.
Hujjatga ko‘ra, ijtimoiy ish — ijtimoiy himoyaga muhtoj shaxslarning imkoniyat va salohiyatini oshirishga ko‘maklashadigan, ijtimoiy xizmatlar va ijtimoiy yordamni rivojlantirish orqali jamiyatda ijtimoiy o‘zgarishlarga xizmat qiladigan kasbiy faoliyat hisoblanadi.
Qonunda ijtimoiy ish tibbiyot, ta’lim, ijtimoiy himoya, bandlik, sud va huquqni muhofaza qiluvchi organlar hamda jazoni ijro etish tizimida tashkil etilishi belgilangan.
Shuningdek, Ijtimoiy himoya milliy agentligi mazkur sohadagi maxsus vakolatli davlat organi etib belgilandi.
Qonunga muvofiq, ijtimoiy xizmatlar va ijtimoiy yordam birlamchi, ixtisoslashgan hamda yuqori ixtisoslashgan darajalarga ajratiladi. Ular fuqaroning yashash joyida, mahallasida, xizmat ko‘rsatuvchi muassasalarda, jumladan, statsionar muassasalarda hamda internet orqali ko‘rsatilishi mumkin.
Ijtimoiy xizmatlar va yordam ko‘rsatish uchun ijtimoiy himoyaga muhtoj shaxs yoki uning qonuniy vakilining murojaati hamda xizmatlarni olishga roziligi asos bo‘ladi.
Bundan tashqari, Ijtimoiy himoya milliy agentligi huzuridagi Ijtimoiy inspeksiya aholini ijtimoiy himoya qilish va ijtimoiy xizmatlar ko‘rsatishda qonunchilik talablariga rioya etilishi ustidan nazoratni amalga oshiruvchi vakolatli organ etib belgilandi.
