Islohotlar bo‘lmasa, 25 yildan keyin Yevropa Ittifoqi yo‘q bo‘ladi — Orban
Vengriya sobiq Bosh vaziri Yevropa Ittifoqi hozirgi holatda o‘zini isloh qila olmayotganini aytib, uning kelajagiga shubha bildirdi.
Ruminiyada o‘tayotgan Tusvanyosh yozgi lageridagi dasturiy nutqida so‘zga chiqqan Orban, Yevropa Ittifoqi yaqin yillarda o‘zini yangilay olmasa, boshqa xalqaro tashkilotlar singari yo‘qolib ketishi yoki tubdan o‘zgarishini ta’kidladi. Bu haqda Point.md xabar berdi.
“Moslasha olmaydiganlar yo‘q bo‘lib ketadi. Men Yevropa Ittifoqining yo‘qolishini istamayman, ammo bugungi holatida u o‘zini isloh qilishga qodir emasdek ko‘rinadi. Shu sababli uning kelajagini porloq deb hisoblamayman”, dedi u.
Orban Yevropa komissiyasi raisi lavozimini egallash taklifiga ham munosabat bildirib, bu lavozimni saqlab qolish emas, balki bekor qilish kerakligini aytdi. Uning fikricha, Yevropa Ittifoqi Komissiyaning vakolatlarini cheklash orqali isloh qilinishi, buning uchun esa “Yevropa uchun Vatanparvarlar” guruhi Bryusselda hokimiyatni qo‘lga olishi lozim.
Sobiq Bosh vazirga ko‘ra, Yevropa Ittifoqidagi muammolar 2015-yilda, Jan-Klod Yunker rahbarligi davrida Yevropa komissiyasi huquqiy muvofiqlashtiruvchi organdan siyosiy organga aylangach boshlangan.
Orban o‘tgan yili ham Tusvanyosh yozgi lagerida Yevropa Ittifoqi parchalanish xavfi ostida ekanini aytib, uni faqat ko‘p tezlikli integratsiya modeli saqlab qolishi mumkinligini ta’kidlagan edi.
Eslatib o‘tamiz, Viktor Orban joriy yil aprel oyida bo‘lib o‘tgan saylovlarda 16 yillik boshqaruvdan so‘ng hokimiyatni boy bergan. Shundan so‘ng u tarafdorlarini mamlakatda “demokratiyani tiklash”ga chaqirgan.
