Kreml To‘qayevning Ukrainadagi mojaroni muzlatish taklifini rad etdi
Kreml To‘qayevning taklifini amaldagi sharoitda amalga oshirib bo‘lmasligini bildirdi. Rossiya bu boradagi asosiy shart sifatida o‘z maqsadlariga erishishni ko‘rsatdi.
Rossiya prezidenti matbuot kotibi Dmitriy Peskov Qozog‘iston prezidenti Qosim-Jo‘mart To‘qayevning Ukrainadagi mojaroni muzlatish taklifiga izoh berdi.
Peskovning aytishicha, Rossiya prezidenti Vladimir Putin To‘qayev bilan uchrashuvda unga Ukrainadagi maxsus harbiy operatsiyaning borishi haqida batafsil ma’lumot bergan.
"Kiyevning amaldagi pozitsiyasi hisobga olinsa, mojaroni shunchaki muzlatishning imkoni yo‘q. Biz uchun asosiy shart — o‘z maqsadlarimizga erishish", — dedi Kreml vakili.
Uning ta’kidlashicha, jangovar harakatlarni to‘xtatish shartlari bundan ikki yil avval Rossiya Tashqi ishlar vazirligi tomonidan bayon qilingan. Peskovga ko‘ra, agar Kiyev tegishli qarorlarni qabul qilsa, harbiy harakatlar hatto shu kunning o‘zidayoq to‘xtatilishi mumkin.
Avvalroq Qozog‘iston prezidenti Qosim-Jo‘mart To‘qayev Omsk shahrida Vladimir Putin bilan uchrashuvda Ukrainadagi mojaroni muzlatish, "Istanbul formulasi 2.0"ga qaytish hamda Rossiya ham ishtirok etadigan yirik davlatlar kafolati ostida tinchlik muzokaralarini davom ettirishni taklif qilgandi.
