Qaysi hollarda bolalar nafaqasi va moddiy yordam to‘lovlari to‘xtatiladi?
Avgust oyidan ayrim oilalar uchun bolalar nafaqasi va moddiy yordam to‘lovlari to‘xtatilishi mumkin. Bunga oiladagi mehnatga layoqatli shaxslarning rasmiy bandligi asosiy mezon sifatida olinadi.
Amaldagi tartibga ko‘ra, "Kambag‘al oila" toifasiga kiritilgan oilalarga 2026-yil fevral oyida tayinlangan bolalar nafaqasi hamda moddiy yordamning 6 oylik muddati avgust oyida yakunlanadi. To‘lovlarning davom ettirilishi yoki to‘xtatilishi oiladagi mehnatga layoqatli a’zolarning bandligiga bog‘liq bo‘ladi. Bu haqda Ijtimoiy himoya milliy agentligi xabar berdi.
Ma’lum qilinishicha, agar oiladagi mehnatga layoqatli shaxs oxirgi olti oy davomida rasmiy ishlamagan yoki Bandlik xizmatlari tomonidan taklif etilgan mos ishni ikki marta yoki undan ko‘p rad etgan bo‘lsa, bolalar nafaqasi va moddiy yordam to‘lovlari keyingi oydan boshlab to‘xtatiladi.
To‘lovlarning uzluksiz davom etishi uchun mehnatga layoqatli oila a’zosi quyidagi holatlardan biri orqali rasmiy bandligini tasdiqlashi lozim:
- mehnat shartnomasi asosida rasmiy ishga joylashish;
- yakka tartibdagi tadbirkor (YATT) sifatida ro‘yxatdan o‘tib, soliqlarni o‘z vaqtida to‘lash;
- o‘zini o‘zi band qilgan shaxs sifatida ro‘yxatdan o‘tib, belgilangan ijtimoiy soliqni to‘liq to‘lash.
Mutasaddilar bolalar nafaqasi va moddiy yordam davlat tomonidan ijtimoiy ko‘makka muhtoj oilalarni qo‘llab-quvvatlash maqsadida ajratilishini, shu bois mehnatga layoqatli oila a’zolarining rasmiy bandligini ta’minlash muhim ekanini eslatdi.
