Yunusoboddagi zararlangan daraxtlarni sog‘lomlashtirish ishlari boshlandi
Daraxtlarda bir nechta zararkunanda turlari aniqlangani ma’lum qilindi.
Ijtimoiy tarmoqlarda Toshkent shahri Yunusobod tumani "Billur" mahallasi hududidagi ko‘p qavatli uylar yonida o‘sayotgan daraxtlarning kasallangani haqida murojaat tarqalgach, holat Ekologiya va iqlim o‘zgarishi milliy qo‘mitasi nazoratiga olindi.
Shundan so‘ng Toshkent shahar ekologiya bosh boshqarmasi, O‘simliklar karantini va himoyasi boshqarmasi hamda Toshkent shahar Obodonlashtirish boshqarmasi mutaxassislari hududda o‘rganish olib bordi.
O‘rganish natijasida hududdagi chinor daraxtlarida bir necha turdagi zararkunandalar aniqlangan. Mutaxassislar daraxtlarni zararkunandalardan xalos etish bo‘yicha zarur tavsiyalar ishlab chiqib, sog‘lomlashtirish ishlarini boshlagan.
Toshkent shahar O‘simliklar karantini va himoyasi boshqarmasining Yunusobod tumani fitosanitariya nazorati inspektori Azizxo‘ja Hamroxo‘jayevning aytishicha, ayni paytda daraxtlarga ishlov berish va ularni zararkunandalardan himoya qilish bo‘yicha zarur chora-tadbirlar amalga oshirilmoqda.
Qayd etilishicha, "O‘simliklarni himoya qilish to‘g‘risida"gi qonunning 13-moddasiga muvofiq, o‘simliklarni zararli organizmlardan himoya qilish bo‘yicha tadbirlarni belgilash davlat o‘simliklar karantini inspektorlari vakolatiga kiradi.
Murojaat muallifi Aleksey Meng mutaxassislar murojaatdan so‘ng tezkor ravishda hududga kelib, daraxtlarni davolash ishlarini boshlaganini bildirib, buning uchun minnatdorlik izhor etdi. Uning so‘zlariga ko‘ra, daraxtlarning ildiz tizimini mustahkamlash va ularni tiklash bo‘yicha davolash ishlari olib borilmoqda.
Ekologiya va iqlim o‘zgarishi milliy qo‘mitasi daraxtlarga shikast yetkazish, ularni zararlash yoki noqonuniy kesish holatlari qonunchilikka muvofiq javobgarlikka sabab bo‘lishini yana bir bor eslatdi.
