Misrda qo‘lga olingan "Jora Tashkentskiy" O‘zbekistonga ekstraditsiya qilindi

Ichki ishlar vazirligi ma’lum qilishicha, jinoyat olamida "qonundagi o‘g‘ri" ("vor v zakone") sifatida tanilgan Georgiy Sorokin Misrning Sharm ash-Shayx shahrida qo‘lga olinib, O‘zbekistonga ekstraditsiya qilingan.

 

Ma’lumotlarga ko‘ra, Georgiy Sorokin 1972-yilda Toshkent shahrida tug‘ilgan. U Rossiya fuqarosi bo‘lib, so‘nggi yillarda Birlashgan Arab Amirliklarining Dubay shahrida yashab kelgan.

 

Sorokin ilk jinoyatini 1990-yilda, 18 yoshida sodir etgan va yetti yilga ozodlikdan mahrum etilgan. Shundan buyon u O‘zbekiston, Rossiya, Qozog‘iston va boshqa davlatlarda bosqinchilik, talonchilik, tovlamachilik, noqonuniy qurol hamda giyohvand moddalarni saqlash kabi jinoyatlar uchun bir necha bor sudlangan.

 

Shuningdek, uning yonidan qalbaki Rossiya pasporti topilgani, ushbu hujjat yordamida uzoq yillar davomida turli davlatlarga qatnab yurgani aniqlangan.

 

Tergov ma’lumotlariga ko‘ra, Sorokin 2021-yilda jinoiy sheriklari bilan oldindan til biriktirib, Toshkent shahrida umumiy qiymati 350 ming AQSh dollariga teng bo‘lgan ikki uyni tovlamachilik yo‘li bilan egallab olgan. Gumonlanuvchilar uy egasiga va uning oila a’zolariga nisbatan zo‘ravonlik ishlatib, ko‘chmas mulkni o‘z nomlariga rasmiylashtirgani aytilmoqda.

 

Mazkur holat yuzasidan Georgiy Sorokinga nisbatan O‘zbekiston Respublikasi Jinoyat kodeksining 165-moddasi 3-qismi "a" bandi bilan jinoyat ishi qo‘zg‘atilgan va u xalqaro qidiruvga berilgan.

 

IIVning bildirishicha, O‘zbekiston huquqni muhofaza qiluvchi organlari hamda Interpol o‘rtasidagi hamkorlik natijasida u Misrda ushlanib, barcha xalqaro huquqiy tartib-taomillar yakunlangach, Interpolning O‘zbekistondagi Milliy markaziy byurosi xodimlariga topshirilgan.

 

Hozirda Georgiy Sorokin O‘zbekiston hududiga olib kelingan bo‘lib, unga nisbatan jinoyat ishi doirasidagi tergov harakatlari davom ettirilmoqda.