Nigeriyada qishloqqa uyushtirilgan hujumda kamida 30 kishi halok bo‘ldi
Hozircha hujum uchun hech bir qurolli guruh javobgarlikni o‘z zimmasiga olmagan.
Nigeriyaning shimoli-g‘arbidagi Kaduna shtatida qurollangan shaxslar qishloqqa hujum uyushtirdi. Oqibatda kamida 30 kishi halok bo‘ldi, yana to‘rt kishi jarohat oldi.
Mahalliy aholi vakillarining ma’lum qilishicha, hujum yarim tunga yaqin Kauru mahalliy boshqaruv hududidagi Naridon qishlog‘ida sodir bo‘lgan. Qurollangan shaxslar qishloqqa bostirib kirib, aholiga qarata tartibsiz o‘q uzgan va uylarni yoqib yuborgan.
Qishloq oqsoqolining kotibi Dogon Rana halok bo‘lganlar orasida sakkiz nafar bola ham borligini ma’lum qildi. Yoshlar yetakchisi Ishaya Davaning aytishicha, ayrim qurbonlar shafqatsizlarcha o‘ldirilgan, jasadlar esa morgga olib ketilgan.
Hozircha hujum uchun hech bir qurolli guruh javobgarlikni o‘z zimmasiga olmagan.
Qayd etilishicha, Nigeriyaning shimoli-g‘arbiy va markaziy hududlarida qurolli jinoiy to‘dalar hujumlari tez-tez sodir bo‘lib turadi. Mamlakatning shimoli-sharqida esa hukumat "Boko Haram" va undan ajralib chiqqan ISWAP guruhi isyonchilariga qarshi kurash olib bormoqda.
Mahalliy aholi so‘zlariga ko‘ra, xavfsizlik kuchlari voqea joyiga hujum sodir bo‘lganidan bir necha soat o‘tib yetib kelgan.
