O‘zbekistonda avgust quruq va issiq boshlanadi, oy oxirida salqin tushishi kutilmoqda
Oyning dastlabki kunlarida ayrim hududlarda havo harorati 43 darajagacha ko‘tarilishi, oy oxiriga borib esa 25–30 darajagacha pasayishi kutilmoqda.
"O‘zgidromet" O‘zbekistonda 2026-yil avgust oyi uchun ob-havo prognozini e’lon qildi.
Prognozga ko‘ra, avgust oyining ilk kunlarida respublika bo‘yicha quruq va biroz issiq ob-havo kuzatiladi. Xususan, 1–2-avgust kunlari havo harorati 38–41 darajagacha, janubiy va cho‘l hududlarda esa 42–43 darajagacha ko‘tariladi.
Shundan so‘ng harorat 3–5 darajaga pasayib, kunduz kunlari asosan 33–38 daraja atrofida, ayrim hududlarda 40 darajagacha bo‘lishi kutilmoqda. Oy oxiriga kelib esa salqin havo oqimlari kirib kelishi hisobiga harorat asta-sekin 25–30 darajagacha pasayishi mumkin.
Meteorologlarning ma’lum qilishicha, avgust oyining o‘rtacha oylik harorati ko‘p yillik me’yorlarga yaqin bo‘ladi. Kechalari oyning birinchi yarmida havo harorati 24–27 daraja, ikkinchi yarmida 17–22 daraja, oy yakunida esa 12–15 darajagacha pasayishi prognoz qilinmoqda.
Oylik yog‘ingarchilik miqdori me’yordan ko‘proq, ayrim hududlarda esa me’yor atrofida bo‘lishi kutilmoqda. Biroq mutaxassislar avgust oyida yog‘ingarchilik me’yori odatda juda kam bo‘lishini eslatdi.
Prognozga ko‘ra, oyning ikkinchi yarmida ayrim kunlari qisqa muddatli, kuchsiz yomg‘ir yog‘ishi mumkin.
"O‘zgidromet"ning qayd etishicha, avgust O‘zbekistonda yilning eng qurg‘oqchil oylaridan biri hisoblanadi. So‘nggi yillarda esa global iqlim o‘zgarishi ta’sirida avgust oyining o‘rtacha harorati 1961–1990-yillar bilan solishtirganda 1,2–1,5 darajaga oshgan.
