Janubiy Koreyaga ishga yuborishdagi 90 mln dollarlik ish bo‘yicha sud boshlanadi
Jinoyat ishi doirasida to‘rt nafar shaxsga nisbatan bir qator og‘ir moddalar bilan ayblov e’lon qilingan.
Janubiy Koreyaga ishga yuborish bilan bog‘liq, qariyb 90 million AQSH dollari zarar yetkazilgani aytilayotgan jinoyat ishi bo‘yicha sud jarayoni 29-iyul kuni Jinoyat ishlari bo‘yicha Bektemir tuman sudida boshlanadi.
“Ezgulik” inson huquqlari jamiyati raisi Abdurahmon Tashanovning ma’lum qilishicha, ish Jinoyat ishlari bo‘yicha Bektemir tuman sudida sudya Dadaxonova raisligida ko‘rib chiqiladi. Mazkur jinoyat ishi yuzasidan dastlabki tergov Bosh prokuratura tomonidan olib borilgan.
Sudlanuvchilar sifatida G‘anchar Ummat o‘g‘li Uzoqov, Timur Badriddinovich Shariksiyev, Alijon G‘aniyevich Ashurov hamda Suxrob Sanjarovich Sayfutdinov ishtirok etmoqda.
Ularga nisbatan Jinoyat kodeksining 210-moddasi 3-qismi “a” va “b” bandlari (pora olish), 243-moddasi (jinoiy faoliyatdan olingan daromadlarni legallashtirish) hamda 301-moddasi 1-qismi (hokimiyatni suiiste’mol qilish, hokimiyat vakolatidan chetga chiqish yoki hokimiyat harakatsizligi) bo‘yicha ayblov e’lon qilingan.
Ayni paytda sudlanuvchilarning aybi sud tomonidan isbotlanmagan. O‘zbekiston qonunchiligiga ko‘ra, shaxs sudning qonuniy kuchga kirgan hukmi bilan aybdor deb topilmaguncha aybsiz hisoblanadi.
Eslatib o‘tamiz, 2026-yil may oyida Bosh prokuratura huzuridagi departament Janubiy Koreyaga ishga yuborish bilan bog‘liq yirik korrupsion sxema fosh etilganini ma’lum qilgandi. Tergov ma’lumotlariga ko‘ra, Tashqi mehnat migratsiyasi agentligi hamda ayrim xususiy bandlik agentliklarining sobiq mansabdorlari ishtirokidagi jinoiy guruh fuqarolardan rasmiy to‘lovlardan tashqari 7–12 ming AQSH dollaridan noqonuniy mablag‘ yig‘gan.
Tergov davomida ushbu sxema orqali qariyb 90 million dollar, shuningdek, alohida epizodlar bo‘yicha yana 45 million dollar noqonuniy olingani aniqlangani bildirilgan.
