Migratsiya agentligi sobiq mansabdorlari xorijga ishga yuborish bo‘yicha korrupsion sxema tuzgani aniqlandi

O‘zbekistondan Janubiy Koreyaga mehnat muhojirlarini ishga jo‘natish bilan bog‘liq yirik korrupsion sxema fosh etildi. Bu haqida Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

 

Ma’lumotlarga ko‘ra, bir guruh shaxslar — jumladan Tashqi mehnat migratsiyasi agentligining (hozirgi Migratsiya agentligi) sobiq mansabdorlari hamda xususiy bandlik agentliklari vakillari — oldindan til biriktirib, uyushgan jinoiy guruh tuzgan.

 

Ular Janubiy Koreyaga ishga yuborishni va’da qilib, 35 nafar fuqarodan jami 263,5 ming AQSH dollari olgan. Shuningdek, rasmiy to‘lovlardan tashqari har bir fuqarodan 7–12 ming dollargacha noqonuniy mablag‘ undirilgan bo‘lib, umumiy zarar miqdori qariyb 90 mln dollarga yetgani qayd etilgan.

 

Yana bir holatda guruh 230 nafar fuqaroni Koreyaga ishga yuborish evaziga 580 ming dollar olgani, shuningdek, Koreyada bo‘lgan 1000 nafar fuqarodan noqonuniy tarzda 5,6 mln dollar undirgani aniqlangan. Umumiy zarar miqdori 45 mln dollarga yetgan.

 

Hozirda Koreyaga ishga yuborilmagan 600 dan ortiq fuqarolardan kelib tushgan murojaatlar ham ko‘rib chiqilmoqda. Tergov organlari yetkazilgan zarar hajmini aniqlash va mablag‘larni qaytarish bo‘yicha choralar ko‘rmoqda.

 

Mazkur holat bo‘yicha jinoyat ishi qo‘zg‘atilgan va hozirda tergov ishlari olib borilmoqda.

 

Bosh prokuratura departamenti ushbu uyushgan jinoiy guruh faoliyatidan zarar ko‘rgan fuqarolarni 71-233-10-07 ishonch telefoni orqali murojaat qilishga chaqirdi. Shuningdek, murojaat qilgan shaxslarning ma’lumotlari maxfiy saqlanishi ta’kidlangan.

 

Avvalroq Janubiy Koreyaga ishga yuborish uchun 400 ming dollardan ortiq mablag‘ni o‘zlashtirgan shaxslar qo‘lga olingani haqida xabar berilgandi.

 

Abdullayeva Shaxrizoda