Qariyb 600 million so‘m yutuqqa ega “Yil o‘qituvchisi” tanlovining final sinovlari o‘tkazilmoqda

Ayni kunlarda Maktabgacha va maktab ta’limi vazirligi tomonidan O‘zbekistonning barcha hududlarida “Yil o‘qituvchisi” tanlovining uchinchi bosqichi bo‘lib o‘tmoqda.

 

 

Yuksak bilim va kasbiy tajribaga ega ustozlarning o‘zaro mahorat maydoniga aylanib borayotgan mazkur tanlovda Respublikaning 208 ta tuman (shahar)ida faoliyat olib borayotgan jami 416 nafar pedagog ishtirok etmoqda.

 

 

Mazkur bosqichda nomzodlar jami 100 ballik tizim asosida, quyidagi 2 ta yo‘nalish bo‘yicha baholanadi:

 

— Ma’naviy-ma’rifiy faoliyat yo‘nalishi — Bunda nomzodning shaxsiy rivojlanishi, o‘z ustida ishlashi, shuningdek, ma’naviy-axloqiy, tarbiyaviy va sinfdan tashqari faoliyati hamda tashabbuslari yuzasidan taqdimoti e’tiborga olinadi va 20 ballik tizim asosda baholanadi.

 

— Test sinovi (kitobxonlik bo‘yicha) yo‘nalishi — Bunda nomzodlar tasdiqlangan adabiyotlar asosidagi 40 ta savoldan iborat test sinovida qatnashadi. Har bir to‘g‘ri javob uchun 2 balldan (jami 80 ball) taqdim etiladi.

 

 

Ma’lumot uchun: “Yil o‘qituvchisi” tanlovining dastlabki bahslarida 2025-yil avgust-dekabr oylarida o‘tkazilgan malaka sinovlari natijalariga asosan eng yaxshi ko‘rsatkichga ega bo‘lgan 47 ming nafarga yaqin pedagoglar qatnashgan (ikkinchi bosqichda 624 nafar).

 

 

Uchinchi (so‘nggi) bosqichda 416 nafar pedagog qatnashmoqda va sinov jarayonlarida yuqori natijaga erishgan 208 nafar pedagog g‘olib, deb tan olinadi.

 

 

Vazirlar Mahkamasining 2025-yil 28-apreldagi tegishli qaroriga asosan, tanlovda har bir tuman (shahar) bo‘yicha birinchi o‘rinni egallagan g‘olib pedagoglar bazaviy hisoblash miqdorining 1 400 baravari (hozirgi vaqtda 576 mln 800 ming so‘m)ga teng pul mukofoti bilan taqdirlanadi.