FIFA sobiq Prezidenti Jahon chempionatiga investor jalb etish rejasini tanqid qildi
U mundial tijorat aktivi emas, balki jahon futbolining madaniy merosi ekanini ta’kidladi.
FIFA'ning sobiq prezidenti Zepp Blatter Jahon chempionatini boshqarish uchun alohida kompaniya tashkil etish va uning 20 foiz ulushini tashqi investorlarga taklif qilish rejasini keskin tanqid qildi. Uning fikricha, mundial tijorat aktivi emas, balki butun futbol jamoatchiligiga tegishli madaniy meros hisoblanadi.
FIFA'ning 1998–2015-yillarda prezidenti bo‘lgan Zepp Blatter Jahon chempionatini boshqarish tizimiga xususiy investorlarni jalb etish tashabbusiga qarshi chiqdi. U Reuters agentligiga bergan intervyusida futbolni tijorat manfaatlariga bo‘ysundirish sportning asosiy qadriyatlariga putur yetkazishini ta’kidladi.
Blatterning so‘zlariga ko‘ra, futbol hech bir shaxs yoki tashkilotning mulki emas.
“Futbol hech kimga tegishli emas. U xalqqa tegishli”, — dedi FIFA sobiq rahbari.
Uning fikricha, FIFA foyda olishga yo‘naltirilgan korporativ tuzilmaga aylansa, tashkilot o‘zining asl mohiyatini yo‘qotadi.
Avvalroq FIFA Jahon chempionati va boshqa yirik musobaqalarni boshqarish uchun alohida sho‘ba kompaniya tuzishni rejalashtirayotgani hamda undagi ulushning 20 foizigacha bo‘lgan qismini tashqi investorlarga taklif etishi mumkinligini ma’lum qilgandi.
Mazkur tashabbus Yevropa futbol doiralarida, xususan, UEFA tomonidan tanqid qilindi. Tashkilot bu qaror Jahon chempionatini tijorat aktiviga aylantirish xavfini tug‘dirishini bildirgan.
Blatter esa mundial xususiy investitsiya fondlari uchun daromad manbaiga aylantirilmasligi kerakligini ta’kidladi.
“FIFA Jahon chempionati bir guruh rahbarlarga tegishli bo‘lgan tijorat aktivi emas. U jahon futbolining madaniy merosining ajralmas qismidir. FIFA esa uning egasi emas, balki himoyachisidir”, — dedi u.
Sobiq prezidentning aytishicha, FIFA'ni boshqargan davrida u bunday tashabbusni hech qachon ko‘rib chiqmagan bo‘lardi. Uning fikricha, foyda va ta’sir ortidan quvuvchi investorlarning sport boshqaruviga kirib kelishi a’zolar manfaatlarini himoya qilish tamoyiliga zid.
Blatter zamonaviy futbolning yuz yildan ortiq vaqt davomida ommalashib kelayotganiga sabab aynan uning jamoatchilik manfaatlariga xizmat qilayotganida ekanini qayd etib, bu tamoyil o‘zgarmasligi lozimligini ta’kidladi.
