Infantino Jahon chempionati ulushlarini xususiy investorlarga sotmoqchi

 
Britaniyaning The Times nashriga ko‘ra, FIFA Forward Enterprise deb nomlangan yangi kompaniya taxminan 20 milliard dollarga baholanmoqda. Rejaga ko‘ra, kompaniyaning 20–30 foiz ulushi xususiy investorlarga sotiladi, FIFA esa nazorat paketini o‘zida saqlab qoladi. Mablag‘lar futbolni rivojlantirish dasturlarini moliyalashtirishga yo‘naltirilishi aytilmoqda.

 
Asosiy investor sifatida Joshua Kushner boshchiligidagi Thrive Capital tilga olinmoqda. Joshua Kushner AQSH prezidenti Donald Trampning kuyovi Jared Kushnerning ukasi hisoblanadi. The Times ma'lumotiga ko‘ra, loyiha yuzasidan Oq uy bilan ham maslahatlashuvlar o‘tkazilgan.

 
Nashrning yozishicha, agar loyiha amalga oshsa, Infantino 2031-yilda FIFA prezidentligi muddati tugagach, yangi kompaniyada yuqori lavozim egallashi va buning evaziga katta miqdorda daromad olishi mumkin. Biroq FIFA bu borada hali yakuniy qaror qabul qilinmaganini, loyiha faqat maslahatlashuv bosqichida ekanini bildirdi.

 
UEFA esa tashabbusni keskin tanqid qilib, "Futbol FIFAning mulki emas va uni sotish ham mumkin emas. Futbolning ruhi va boshqaruvi savdo qilinadigan aktiv emas", deya bayonot berdi.

 
Yevropa futbol uyushmasi bu reja futbol boshqaruvi tarixida xavfli burilish bo‘lishi mumkinligini ta'kidlab, shaffoflik yo‘qligi va tijorat manfaatlari sport qadriyatlaridan ustun qo‘yilayotganidan xavotir bildirdi. Ayrim Yevropa futbol doiralari hatto kelgusida FIFA bilan jiddiy qarama-qarshilik yuzaga kelishi yoki Jahon chempionati boykot qilinishi ehtimolini ham istisno qilmayapti.