“Endi bizning navbatimiz” — AQSh Eronga yana zarba berdi

 

AQSh Eronga qarshi harbiy zarbalarni qayta boshlaganini ma’lum qildi. Vashington yangi hujumlarni Eronning Yaqin Sharqdagi AQSh kuchlariga qarshi harakatlariga javob sifatida izohladi.

 

AQSh Markaziy qo‘mondonligi (CENTCOM) ma’lumotiga ko‘ra, harbiy amaliyot davomida Islom inqilobi qo‘riqchilari korpusi (IRGC)ga tegishli qo‘mondonlik markazlari, raketa va dron uchirish maydonchalari hamda qirg‘oq qo‘riqlash infratuzilmasiga zarbalar berilgan.

 

CENTCOM bayonotida operatsiya AQSh harbiylari va mintaqadagi ittifoqchilar xavfsizligini ta’minlash maqsadida amalga oshirilgani qayd etildi.

 

Reuters agentligi Eron ommaviy axborot vositalariga tayanib xabar berishicha, mamlakat janubidagi bir qator hududlarda, jumladan Ahvaz shahri, Qeshm oroli va Bushehr atrofida portlashlar kuzatilgan.

 

AQSh Prezidenti Donald Tramp avvalroq Eronning Iordaniyadagi AQSh harbiy bazasiga uyushtirilgan hujumidan so‘ng Vashington “juda kuchli javob” berishini bildirgan edi. Uning ta’kidlashicha, AQSh harakatlari Tehronning so‘nggi hujumlariga javob hisoblanadi.

 

Shuningdek, AQSh va Saudiya Arabistoni Iroq hududidagi Eron tomonidan qo‘llab-quvvatlanayotgan qurolli guruhlar obyektlariga ham zarbalar berganini ma’lum qildi. Iroq rasmiylari esa mamlakat hududiga berilgan hujumlarni qoralab, buni davlat suverenitetining buzilishi sifatida baholagan.

 

So‘nggi harbiy harakatlar fonida Yaqin Sharqdagi vaziyat keskinligicha qolmoqda. Shu bilan birga, ayrim xalqaro nashrlar tomonlar o‘rtasida diplomatik muloqotni tiklash ehtimoli ham muhokama qilinayotganini xabar bermoqda.