Husiylar Saudiya Arabistoniga Iroq hududidan hujum qilgani aytilmoqda
Manbalarga ko‘ra, operatsiyalar Iroqdagi Eronga yaqin qurolli guruhlar bilan hamkorlikda tashkil etilgan.
Yamandagi husiylar Saudiya Arabistoniga uyushtirilgan so‘nggi hujumlarning bir qismini Iroq hududidan turib amalga oshirgani aytilmoqda.
Mintaqadagi ikki rasmiyning Reuters'ga bildirishicha, husiylar joriy hafta Saudiya Arabistonining sharqiy viloyatidagi neft obyektlariga Iroq hududidan zarba bergan. Ularning ta’kidlashicha, ayrim hujumlar Iroqdagi Eronga yaqin qurolli guruhlar bilan birgalikda va Eron Islom inqilobi qo'riqchilari korpusi (IIQK) nazorati ostida amalga oshirilgan.
Qayd etilishicha, bu holat Eron boshchiligidagi "Qarshilik o‘qi" tarkibidagi guruhlar o‘rtasidagi hamkorlik kuchayganini ko‘rsatadi. Tahlilchilarga ko‘ra, Suriyada Bashar Asad hokimiyatining qulashi va Livanda Hizbullohning zaiflashishi ortidan Iroq ushbu ittifoq uchun muhim tayanch hududga aylanmoqda.
Saudiya Arabistoni chorshanba kuni AQSH bilan birgalikda Iroqdagi hujumlarga aloqador deb hisoblangan obyektlarga havo zarbalari berdi. Riyod rasmiy ravishda hujumlar uchun Eronga yaqin Iroq qurolli guruhlarini aybladi. Husiylar esa zarbalarni o‘zlari amalga oshirganini ma’lum qilgan. Iroq hukumati voqea yuzasidan tergov olib borayotganini bildirgan.
Saudiya Arabistoni, Eron va Iroq hukumatlari hamda husiylar Reuters’ning izoh so‘roviga javob bermadi. Husiylar hujumlarni Yamandagi Saudiya amaliyotlariga javob va qirollik tomonidan joriy etilganini da’vo qilayotgan "qamal"ni buzishga qaratilganini bildirgan. Riyod esa bunday qamal mavjudligini rad etmoqda.
Husiylar va Eronga yaqin Iroq qurolli guruhlari o‘rtasidagi hamkorlik avvaldan mavjud bo‘lib, 2024-yilda tomonlar Isroilga qarshi ilk qo‘shma operatsiyasini ham e’lon qilgan edi. Tahlilchilarga ko‘ra, Iroqning keng hududi va Saudiya Arabistoni bilan 800 kilometrdan ortiq chegarasi bunday hujumlarni amalga oshirish uchun qulay sharoit yaratmoqda.
Shuningdek, Iroq bosh vaziri Ali az-Zaydi Saudiya Arabistoniga rejalashtirilgan tashrifini bekor qilgan. U sentyabr oyi oxirigacha mamlakatdagi barcha qurolli tuzilmalarni davlat nazoratiga olish rejasini ilgari surmoqda.
