Andijonda 39 ming dollar evaziga yer olib berishni va’da qilgan shaxslar ushlandi
Ular davlat zaxirasidagi 24 sotix yer maydonini mansabdor tanishlari orqali fuqaro nomiga rasmiylashtirib berishni va’da qilgan.
Andijon viloyatida davlat zaxirasidagi yer maydonini noqonuniy rasmiylashtirish bilan bog‘liq korrupsion holat fosh etildi. Bu haqda DXX xabar berdi.
Ma’lum qilinishicha, Andijon viloyati Marhamat tumanida faoliyat yurituvchi bank xizmatlari markazlaridan birining boshlig‘i hamda “Norin–Qoradaryo” irrigatsiya tizimlari havza boshqarmasi mashinisti o‘zaro til biriktirib, 1989-yilda tug‘ilgan fuqaroning ishonchiga kirgan.
Ular Marhamat tumani hokimligi zaxirasidagi 24 sotix yer maydoni go‘yoki turar joy toifasiga o‘tkazilgani va unga oid hujjatlar mavjudligini aytib, mansabdor tanishlari orqali ushbu yer uchastkasini fuqaro nomiga rasmiylashtirib berishni va’da qilgan. Buning evaziga esa 39 ming AQSH dollari talab qilgan.
Davlat xavfsizlik xizmati, Iqtisodiy jinoyatlarga qarshi kurashish departamenti hamda Ichki ishlar organlari xodimlari hamkorligida o‘tkazilgan tezkor tadbir davomida boshqarma mashinisti oldindan 25 ming AQSH dollarini olayotgan vaqtida ashyoviy dalillar bilan qo‘lga olindi.
Mazkur holat yuzasidan gumonlanuvchilarga nisbatan jinoyat ishi qo‘zg‘atilib, tergov harakatlari olib borilmoqda.
