AQSh Qeshm orolidagi uyga 900 kilogrammlik aviabomba tashlagan — NYT
Nashr tahliliga ko‘ra, hujum oqibatida bir oila a’zolari halok bo‘lgan, zarba berilgan hudud yaqinida esa harbiy obyektlar aniqlanmagan.
AQSHning Eronning Qeshm oroliga bergan zarbasi aholi zich yashaydigan hududdagi turar joyni nishonga olgan bo‘lishi mumkin. Bu haqda The Times of India nashri The New York Times nashriga tayanib xabar berdi.
Nashr video, foto va sun’iy yo‘ldosh tasvirlari tahliliga tayanib, hujum oqibatida er-xotin va ularning ikki yoshli farzandi halok bo‘lganini yozdi. Oilaning yana ikki nafar farzandi vayronalar ostidan tirik qutqarilgan va shifoxonada davolanmoqda.
Qurol-yarog‘ bo‘yicha ekspertlar baholashicha, zarbada AQSH arsenalidagi eng yirik oddiy aviabombalardan biri — JDAM boshqaruv to‘plami bilan jihozlangan 2 ming funt (taxminan 900 kilogramm) og‘irlikdagi Mark 84 bombasi qo‘llangan bo‘lishi mumkin.
Surishtiruvda qayd etilishicha, portlash oqibatida kamida to‘qqiz metr diametrli o‘ra hosil bo‘lgan, bomba parchalari va shikastlangan avtomobillar 60 metrdan ortiq masofaga sochilib ketgan. Hujum natijasida qariyb 20 oila boshpanasiz qolgan.
The New York Times jurnalistlari vayron bo‘lgan uy atrofida harbiy obyektlar yoki zarba harbiy nishonga qaratilganini tasdiqlovchi dalillarni aniqlamaganini ma’lum qildi.
AQSH Markaziy qo‘mondonligi (CENTCOM) esa tinch aholi orasidagi ehtimoliy qurbonlar haqidagi ma’lumotlarni o‘rganayotganini bildirgan. Biroq qo‘mondonlik zarbaning asl nishoni nima bo‘lgani va nima sababdan aynan bunday yuqori quvvatli bomba qo‘llanganiga izoh bermagan.
