Fermerlarga dizel yoqilg‘isi uchun 2 mln so‘mgacha subsidiya beriladi
Subsidiya faqat birja savdolari orqali xarid qilingan dizel yoqilg‘isiga tatbiq etiladi.
Adliya vazirligi qishloq xo‘jaligi korxonalari tomonidan birja savdolari orqali xarid qilingan dizel yoqilg‘isi qiymatining bir qismini qoplash uchun subsidiya ajratish tartibi to‘g‘risidagi vaqtinchalik nizomni davlat ro‘yxatidan o‘tkazdi.
Nizomga ko‘ra, paxta va bug‘doy yetishtiruvchi fermerlar 2026-yil 1-apreldan 1-iyulgacha birja savdolari orqali sotib olgan dizel yoqilg‘isining bir tonnasi narxi 13 mln so‘mdan oshgan taqdirda, oshgan summaning 2 mln so‘mgacha bo‘lgan qismi davlat tomonidan subsidiya sifatida qoplab beriladi.
Subsidiyalar proaktiv, ya’ni avtomatik tartibda ajratiladi. Buning uchun fermerlardan alohida ariza topshirish talab etilmaydi.
Subsidiyadan foydalanish uchun dizel yoqilg‘isi faqat birja savdolari orqali xarid qilingan bo‘lishi, fermerning ekin maydonlari va ekin turlari Agroportal tizimiga kiritilgan bo‘lishi hamda xarid qilingan yoqilg‘i aprel—iyun oylaridagi agrotexnik ishlarda foydalanilgan bo‘lishi lozim.
Subsidiya miqdori Agroportal ma’lumotlari asosida avtomatik hisoblanadi. Hisoblangan mablag‘lar vakolatli agentlik tomonidan fermerning tijorat bankidagi maxsus hisobvarag‘iga uch ish kuni ichida o‘tkaziladi.
Agar texnik nosozlik yoki ma’lumotlar almashinuvidagi uzilish sababli fermer haqidagi ma’lumotlar agentlikka yetib bormasa, u agentlikka yozma ravishda yoki Agroportal orqali elektron shaklda murojaat qilishi mumkin.
