AQSHning 109 mln dollarlik F-35B qiruvchi samolyoti halokatga uchradi

AQSHning F-35B rusumidagi beshinchi avlod qiruvchi samolyoti Kaliforniya shtatida halokatga uchradi. Uchuvchi katapult tizimi yordamida samolyotni tark etishga muvaffaq bo‘lgan va uning hayotiga xavf yo‘qligi ma’lum qilindi. Bu haqda Al Jazeera xabar berdi.

 

AQSH Dengiz piyodalari korpusi ma’lumotiga ko‘ra, hodisa San-Diyegodagi Miramar aviabazasi yaqinida yuz bergan. Uchuvchi voqea joyidan tibbiyot muassasasiga olib borilgan. Uning ahvoli barqaror ekani, hayot uchun xavf tug‘dirmaydigan jarohatlar olgani bildirildi.

 

Hodisa joyidan olingan havodagi tasvirlarda samolyot qulagan daladan qalin qora tutun ko‘tarilgani ko‘rinadi. Voqea joyiga harbiylar, yong‘in-qutqaruv bo‘linmalari va maxsus texnikalar jalb etilgan. Qutqaruvchilar samolyot halokati ortidan yuzaga kelgan o‘t-o‘lan yong‘inini bartaraf etish ishlarini olib borgan.

 

Miramar aviabazasi avvalroq AQSH Harbiy-dengiz kuchlarining mashhur Top Gun qiruvchi uchuvchilar maktabiga mezbonlik qilgan. Mazkur maktab 1996-yilda Nevada shtatidagi Fallon aviabazasiga ko‘chirilgan.

 

F-35B — F-35 oilasining qisqa masofadan uchib chiqish va vertikal qo‘nish imkoniyatiga ega modifikatsiyasi hisoblanadi. Bir dona bunday samolyotning qiymati taxminan 109 million dollarni tashkil etadi.

 

AQSH Hisob palatasining (GAO) 2024-yildagi hisobotiga ko‘ra, AQSH Qurolli kuchlari tarkibida 630 tadan ortiq F-35 samolyoti xizmat qilmoqda. Kelgusida yana 1 800 dan ortiq samolyot xarid qilinishi rejalashtirilgan bo‘lib, butun F-35 dasturining umumiy qiymati qariyb 2 trillion dollarga yetishi kutilmoqda.

 

Flight Safety Foundation tarkibidagi Aviation Safety Network ma’lumotlariga ko‘ra, bu joriy yil AQSHda halokatga uchragan kamida sakkizinchi harbiy samolyot bo‘ldi. Eng yirik aviahalokat iyun oyida Kaliforniyadagi Mojave cho‘lida sodir bo‘lib, B-52 strategik bombardimonchi samolyoti qulagani oqibatida bortdagi sakkiz kishining barchasi halok bo‘lgan.