Indoneziyada 250 kishi bo‘lgan yo‘lovchi paromi yonib ketdi
Hodisa oqibatida kamida besh kishi halok bo‘lgan, 41 kishi bedarak yo‘qolgan. Hozirda qidiruv-qutqaruv ishlari davom etmoqda.
Indoneziyada bortida kamida 250 kishi bo‘lgan yo‘lovchi paromida yong‘in chiqishi oqibatida besh kishi halok bo‘ldi, yana 41 kishi bedarak yo‘qolgan. Bu haqda mamlakat Milliy qidiruv va qutqaruv agentligiga (Basarnas) tayanib, BBC xabar berdi.
Ma’lumotlarga ko‘ra, KMP Mutiara Sentosa 2 paromi Sharqiy Yava provinsiyasidagi Surabaya shahridan Janubiy Sulavesidagi Makassar shahriga yo‘l olgan paytda Madura oroli yaqinida yonib ketgan. Parom kapitani yong‘in haqida favqulodda xizmatlarga dengizda bo‘lgan vaqtida xabar bergan.
Basarnasning bildirishicha, yong‘in mahalliy vaqt bilan taxminan soat 06:00–07:00 oralig‘ida boshlangan. Qutqaruvchilar voqea joyiga yetib borguniga qadar kema deyarli to‘liq alanga ichida qolgan. Yo‘lovchilar esa qutqaruvni kutib, kemaning boshqaruv qismi va old qismida jon saqlab turgan.
Mahalliy OAV tarqatgan videolarda paromning yuqori qismidan quyuq tutun va alanga ko‘tarilayotgani, ayrim yo‘lovchilar esa qutulish maqsadida o‘zini dengizga tashlagani aks etgan. Qutqaruv jiletlarini kiygan odamlarga qutqaruv halqalari uloqtirilgan va ular qutqaruv kemalariga olib chiqilgan.
Hozircha yong‘inning kelib chiqish sababi rasman ma’lum qilinmagan.
Rasmiylarning so‘nggi ma’lumotlariga ko‘ra, hodisa oqibatida besh kishi halok bo‘lgan, 41 kishi bedarak yo‘qolgan. Qidiruv-qutqaruv ishlari davom etmoqda.
