Qamchiq dovonida Isuzu va Epica to‘liq yonib ketdi
Epica haydovchisi boshqaruvni yo‘qotib, yo‘l chetida to‘xtab turgan yuk mashinasiga urilgan.
Qamchiq dovonida yuk avtomobili va yengil avtomobil ishtirokida sodir bo‘lgan yo‘l-transport hodisasi oqibatida ikkala transport vositasi to‘liq yonib ketdi. Bu haqda YHXX xabar berdi.
Ma’lum qilinishicha, voqea 2-avgust kuni soat 08:20 atrofida A-373 avtomobil yo‘lining Qamchiq dovoni hududidan o‘tuvchi 168-kilometrida sodir bo‘lgan.
Dastlabki ma’lumotlarga ko‘ra, Toshkent–vodiy yo‘nalishida harakatlanayotgan Isuzu rusumli yuk avtomobilida texnik nosozlik yuzaga kelgan. Shu sababli haydovchi transport vositasini yo‘l chetiga to‘xtatgan.
Oradan ko‘p o‘tmay, shu yo‘nalishda harakatlanayotgan Epica rusumli avtomobil haydovchisi boshqaruvni yo‘qotib, to‘xtab turgan yuk avtomobilining orqa qismiga kelib urilgan.
To‘qnashuv oqibatida yong‘in kelib chiqib, har ikki avtomobil to‘liq yonib ketgan. Hodisada Epica avtomobili haydovchisi va bir nafar yo‘lovchi yengil tan jarohati olgan. Ularga voqea joyida birinchi tibbiy yordam ko‘rsatilgan.
Hodisa joyiga Favqulodda vaziyatlar vazirligi hamda Yo‘l-patrul xizmati xodimlari jalb etilib, harakat xavfsizligi ta’minlandi. Ayni paytda transport vositalarini qatnov qismidan olib tashlash ishlari olib borilmoqda.
