2027-yildan nogironligi bo‘lgan bolalar vaucher asosida assistiv jihozlar bilan ta’minlanadi
Nogironligi bo‘lgan bolalarning uyiga yaqin joyda maxsus sinflar tashkil etgan nodavlat maktablarga har bir o‘quvchi uchun subsidiya ajratiladi.
Prezident Shavkat Mirziyoyev alohida ta’lim ehtiyojlari bo‘lgan bolalarni ta’lim va ijtimoiy xizmatlar bilan qamrab olish, shuningdek, nogironligi bo‘lgan shaxslar uchun ta’lim imkoniyatlarini kengaytirishga qaratilgan takliflar taqdimoti bilan tanishdi.
Taqdimotda qayd etilishicha, bugungi kunda O‘zbekistonda nogironligi bo‘lgan 168 mingdan ortiq bola istiqomat qiladi. Ularning 133,8 ming nafari ta’lim va ijtimoiy xizmatlar bilan qamrab olingan bo‘lsa, yana 34,6 ming nafar bolani ta’limga jalb etish zarur.
Shu maqsadda 2026-yil 1-oktyabrdan Xorazm va Navoiy viloyatlarida alohida ta’lim ehtiyojlari bo‘lgan bolalarning ehtiyojlarini baholashning yangi mexanizmi sinov tariqasida joriy etiladi. Unda ijtimoiy xodimlar har bir bola bilan "oilabay" ishlaydi va unga mos ta’lim hamda ijtimoiy xizmatlar belgilanadi.
2026/2027-o‘quv yilidan maxsus maktablarda ta’lim individual rejalar asosida tashkil etilishi, ko‘zi ojiz pedagoglar hamda boshlang‘ich sinflarga shaxsiy assistent va yordamchi xodimlar biriktirilishi rejalashtirilgan.
Shuningdek, nogironligi bo‘lgan bolalarning uyiga yaqin joyda ta’lim olishiga sharoit yaratish maqsadida korreksion sinflar tashkil etgan nodavlat maktablarga har bir o‘quvchi uchun subsidiya ajratiladi. Har yili kamida 50 ta maktabning inklyuziv muhitni yaxshilashga qaratilgan tashabbuslari grant asosida moliyalashtiriladi.
2027-yildan bolalarni matnni o‘qish qurilmalari, ovoz sintezatorlari, Brayl displeylari va boshqa assistiv jihozlar bilan vaucher asosida ta’minlash taklif etildi.
2027/2028-o‘quv yilidan esa nogironligi bo‘lgan shaxslarga kirish va sertifikat imtihonlarida qo‘shimcha vaqt, Brayl alifbosi, surdotarjimon, assistent va boshqa zarur sharoitlar yaratiladi.
