Hindistondagi suv toshqinlari oqibatida halok bo‘lganlar soni 85 nafarga yetdi
Tabiiy ofat oqibatida 349 ta aholi punkti suv ostida qolgan bo‘lib, 300 mingdan ortiq aholi jabr ko‘rgan.
Hindistonning shimoli-sharqidagi Assam shtatida kuzatilayotgan kuchli suv toshqinlari oqibatida halok bo‘lganlar soni 85 nafarga yetdi. Bu haqda shtatning Tabiiy ofatlarni boshqarish boshqarmasi ma’lum qildi deydi TASS.
Rasmiy ma’lumotlarga ko‘ra, tabiiy ofat oqibatida 349 ta aholi punkti suv ostida qolgan bo‘lib, 300 mingdan ortiq aholi jabr ko‘rgan. Shuningdek, suv toshqinlari 15 ming 400 gektardan ortiq qishloq xo‘jaligi yerlariga zarar yetkazgan.
Hududda qutqaruv ishlari davom etmoqda. Hindiston armiyasi hamda harbiy-havo kuchlari qutqaruv operatsiyalariga jalb etilgan. Tashqi dunyo bilan aloqasi uzilgan, borish qiyin bo‘lgan hududlarga zarur oziq-ovqat va dori-darmonlarni yetkazish uchun dronlardan foydalanilmoqda.
Ayni paytda Assamning 10 ta tumanida 44 ta vaqtinchalik evakuatsiya lageri tashkil etilgan bo‘lib, ularda 15 mingga yaqin fuqaro joylashtirilgan. Shuningdek, jabrlangan aholiga yordam ko‘rsatish maqsadida gumanitar yordam tarqatish markazlari faoliyat yuritmoqda.
Mutasaddilar hududdagi vaziyatni nazoratga olgan bo‘lib, qutqaruv va tiklash ishlari davom ettirilmoqda.
