O‘zbekiston Prezidentining yana bir global tashabbusi BMTda keng e’tirof etildi va qabul qilindi
Tashabbusda parlamentlarning ijtimoiy rivojlanishdagi o‘rni, ayollar va yoshlarning parlamentdagi ishtirokini kengaytirish hamda xalqaro hamkorlikni kuchaytirish masalalari o‘z aksini topgan.
BMT Bosh Assambleyasi Nyu-York shahrida bo‘lib o‘tgan yig‘ilishda “Ijtimoiy rivojlanishni jadallashtirishda parlamentlarning rolini kuchaytirish to‘g‘risida”gi rezolyutsiyani a’zo davlatlarning mutlaq ko‘pchilik ovozi bilan qabul qildi.
Mazkur tashabbus ilk bor O‘zbekiston Prezidenti Shavkat Mirziyoyev tomonidan 2020-yil sentyabr oyida BMT Bosh Assambleyasining 75-sessiyasidagi nutqida ilgari surilgan edi. Keyingi yillarda olib borilgan diplomatik ishlar natijasida ushbu g‘oya rezolyutsiya loyihasi sifatida shakllantirilib, BMTga a’zo davlatlar tomonidan qo‘llab-quvvatlandi.
Rezolyutsiyada Toshkent shahrida o‘tkazilgan Parlamentlararo ittifoqning 150-Assambleyasi hamda uning yakunida qabul qilingan Toshkent deklaratsiyasining ahamiyati alohida qayd etilgan.
Hujjat parlamentlarning ijtimoiy rivojlanishdagi rolini kuchaytirish, ayollar va yoshlarning parlament faoliyatidagi ishtirokini kengaytirish, rivojlanayotgan davlatlarni qo‘llab-quvvatlash hamda ijtimoiy sohadagi xalqaro hamkorlikni rivojlantirishga qaratilgan.
Rezolyutsiya bo‘yicha o‘tkazilgan ovoz berishda 167 davlat uni yoqlab ovoz berdi. Hujjatga 61 mamlakat, jumladan Avstriya, Germaniya, Xitoy, Yaponiya, Janubiy Koreya, Braziliya va Ispaniya hammuallif sifatida qo‘shilgan.
Qayd etilishicha, mazkur rezolyutsiyaning qabul qilinishi O‘zbekiston tomonidan ilgari surilgan tashabbuslarning xalqaro maydonda qo‘llab-quvvatlanayotganini hamda mamlakatning parlamentlararo hamkorlik va ijtimoiy rivojlanish yo‘nalishidagi sa’y-harakatlariga berilgan e’tirofni aks ettiradi.
