O‘zbekistondagi reabilitatsiya markazlari yashash joyi bo‘lmaganlarga vaqtinchalik boshpanaga aylantiriladi
Boshpanasiz shaxslar vaqtinchalik boshpana va ijtimoiy tiklanish markazlariga joylashtirilib, ular uchun hujjatlarni tiklash, kasbga o‘qitish va ishga joylashtirish bo‘yicha individual reja ishlab chiqiladi.
Prezident Shavkat Mirziyoyevga muayyan yashash joyiga ega bo‘lmagan shaxslarga ijtimoiy xizmatlar ko‘rsatish tizimini takomillashtirishga qaratilgan yangi takliflar taqdim etildi.
Taqdimotda amaldagi reabilitatsiya muassasalarini vaqtinchalik boshpana va ijtimoiy tiklanish markazlariga aylantirish rejalashtirilayotgani ma’lum qilindi. Hozirda respublika bo‘yicha 726 o‘ringa mo‘ljallangan 11 ta reabilitatsiya markazi faoliyat yuritmoqda. Joriy yilning birinchi yarmida ularga 1,1 ming nafar shaxs joylashtirilgan.
Yangi tizimga ko‘ra, boshpanasiz shaxslar markazlarga o‘z murojaati, “mahalla yettiligi” tavsiyasi yoki ijtimoiy xodim hamda profilaktika inspektori ko‘magida joylashtiriladi. Har bir fuqaro uchun individual reja ishlab chiqilib, hujjatlarini tiklash, tibbiy va ijtimoiy xizmatlar ko‘rsatish, kasbga o‘qitish hamda ishga joylashtirish choralari belgilanadi.
Shuningdek, markazlarda bandlikni qo‘llab-quvvatlash bo‘linmalari tashkil etilishi, tadbirkorlarga bo‘sh joylar imtiyozli shartlarda ijaraga berilishi rejalashtirilgan. Boshpanasiz shaxslarga kasb-hunarga o‘qish uchun vaucher ajratish, ularni ijtimoiy ehtiyojmand toifaga kiritish va ular uchun ish o‘rinlarini zaxiralash ham taklif etilgan.
Bundan tashqari, nodavlat tashkilotlarga davlat ijtimoiy buyurtmalarini joylashtirish orqali boshpanasiz shaxslarni vaqtinchalik boshpana, issiq ovqat va kiyim-bosh bilan ta’minlash qamrovini kengaytirish ko‘zda tutilmoqda.
