Pokistondagi tinchlik mitingida terrorchi o‘zini portlatdi
Portlash oqibatida kamida 14 kishi halok bo‘lgan.
CNN xabariga ko'ra, hodisa Svat tumanining Kabal shahrida yuz bergan. Yuzlab odamlar politsiya bo‘limi yaqinida terrorizmga qarshi shiorlar bilan tinchlik namoyishini o‘tkazayotgan paytda terrorchi odamlar orasida o‘zini portlatgan. Dastlabki ma'lumotlarga ko‘ra, qurbonlar orasida 5 nafar politsiyachi va 9 nafar tinch aholi vakili bor. Yana 20 dan ortiq kishi turli darajada tan jarohati olgan.
Voqea guvohlarining aytishicha, portlashdan bir necha daqiqa avval miting ishtirokchilari hukumatni mintaqada xavfsizlikni kuchaytirishga va qurolli guruhlarga qarshi qat'iy choralar ko‘rishga chaqirgan. Portlash namoyish eng gavjum pallaga yetgan vaqtda sodir bo‘lgan.
Hujum uchun hozircha hech bir qurolli guruh javobgarlikni o‘z zimmasiga olmagan. Shunga qaramay, huquq-tartibot idoralari asosiy gumonni "Tehrik-i Tolibon Pokiston" (TTP) harakatiga qaratmoqda. So‘nggi yillarda ushbu guruh Xayber Paxtunxva viloyatida xavfsizlik kuchlari va tinch aholiga qarshi hujumlarni keskin ko‘paytirgan.
Pokiston prezidenti Osif Ali Zardoriy va bosh vazir Shahboz Sharif hujumni keskin qoralab, aybdorlarni javobgarlikka tortish va jabrlanganlarga barcha zarur yordam ko‘rsatilishini ma'lum qildi.
