Shahrisabz tumani hokimining fuqaro xonadonidagi xatti-harakatlari yuzasidan xizmat tekshiruvi so‘raldi
Hokim fuqaroning yashash sharoitini tanqid qilgani va jarima qo‘llash bo‘yicha topshiriq bergani aks etgan video tarqaldi. Holat yuzasidan Korrupsiyaga qarshi kurashish agentligi viloyat hokimligiga xizmat tekshiruvi o‘tkazish bo‘yicha taqdimnoma kiritdi.
Ijtimoiy tarmoqlarda Qashqadaryo viloyatining Shahrisabz tumani hokimi Samad Hasanovning mahalliy aholi xonadoniga kirib, fuqaro bilan muloqoti aks etgan videotasvir keng muhokamalarga sabab bo‘ldi.
Videoda hokim xonadon egasiga yashash joyini ozoda saqlash bo‘yicha tanbeh berib, uyning sanitariya holatini tanqid qilgani, tasvirlarni mahalla Telegram guruhiga joylashtirishini aytgani aks etgan. Shuningdek, u mazkur xonadondan "hech kim kelin olmasligi" haqida fikr bildirgan, fuqaroning tush payti dam olayotganini tanqid qilgan hamda mas’ullarga xonadon egalariga jarima qo‘llash bo‘yicha topshiriq bergani ko‘rinadi.
Videoda mahalla raisi sifatida tanishtirilgan ayol ham fuqaroni uy va hovlini toza saqlamagani uchun tanqid qilgan.
Holat yuzasidan Korrupsiyaga qarshi kurashish agentligi munosabat bildirib, har qanday darajadagi rahbar fuqarolar bilan muloqotda davlat fuqarolik xizmatchilarining odob-axloq qoidalariga qat’iy rioya qilishi shartligini eslatdi.
Agentlik ta’kidlashicha, fuqarolarning shaxsiy hayoti daxlsizligini buzish, ularning sha’ni va qadr-qimmatini kamsitish, shuningdek, asossiz ma’muriy bosim o‘tkazish amaldagi qonunchilik va etika me’yorlariga zid hisoblanadi.
Ma’lum qilinishicha, Agentlik o‘z vakolati doirasida Qashqadaryo viloyati hokimligiga mazkur holat yuzasidan qonunchilikda belgilangan tartibda xizmat tekshiruvi o‘tkazish hamda huquqiy baho berish bo‘yicha taqdimnoma kiritgan.
