Toshkentdagi 10 nafar tuman hokimiga nisbatan xizmat tekshiruvi tayinlandi
Toshkent shahar hokimining farmoyishiga ko‘ra, tekshiruv natijalari yuzasidan tegishli xulosalar rasmiylashtiriladi.
Toshkent shahar hokimining 2026-yil 3-avgustdagi farmoyishi bilan Bektemir, Mirobod, Mirzo Ulug‘bek, Olmazor, Sergeli, Uchtepa, Chilonzor, Shayxontohur, Yunusobod va Yashnobod tumanlari hokimlariga nisbatan xizmat tekshiruvi tayinlandi.
Qayd etilishicha, tekshiruv O‘zbekiston Respublikasi Korrupsiyaga qarshi kurashish agentligining 2026-yil 22-iyuldagi taqdimnomasida qayd etilgan holatlarni o‘rganish maqsadida tashkil etilgan.
Farmoyishga muvofiq, xizmat tekshiruvini o‘tkazish uchun Toshkent shahar komissiyasi tuzilib, unga taqdimnomada keltirilgan vajlarni xolis va sifatli o‘rganish, natijalari bo‘yicha tegishli xulosalarni rasmiylashtirish vazifasi yuklatilgan.
Shuningdek, zarurat tug‘ilganda tekshiruv jarayoniga tegishli vazirlik va idoralarning mutaxassislari ham jalb etilishi mumkinligi qayd etilgan. Mazkur farmoyish ijrosi Toshkent shahar hokimining komplayens va korrupsiyaga qarshi ichki nazorat bo‘yicha o‘rinbosari zimmasiga yuklatilgan.
