Arab va musulmon davlatlari Quddusdagi muqaddas qadamjolarni himoya qilish rejasini ishga tushirdi

Arab va musulmon davlatlari tashqi ishlar vazirlari bosib olingan Sharqiy Quddus hamda u yerdagi islomiy va nasroniy muqaddas qadamjolarda Isroil tomonidan sodir etilayotgan qonunbuzarliklarni hujjatlashtirish va xalqaro hamjamiyatga yetkazish uchun doimiy mexanizm tashkil etishga kelishib oldi. Bu haqda Al Jazeera xabar berdi.

 

Iordaniyada bo‘lib o‘tgan yig‘ilish yakunida qabul qilingan qo‘shma bayonotga ko‘ra, Isroilning muqaddas qadamjolar va ibodat qiluvchilarga nisbatan harakatlarini yorituvchi maxsus media platforma ishga tushiriladi. U orqali ma’lumotlar xalqaro tashkilotlar va jahon jamoatchiligiga yetkaziladi.

 

Yig‘ilishda Arab davlatlari ligasi Bosh kotibi Ahmad Abul G‘ayt, Arab vazirlarining Quddus bo‘yicha qo‘mitasi a’zolari, shuningdek, Turkiya, Pokiston, Indoneziya va Malayziya vakillari ishtirok etdi. Ular xalqaro hamjamiyatni Quddus va uning muqaddas qadamjolarida Isroil amalga oshirayotgan choralarni to‘xtatish uchun zudlik bilan amaliy harakatlar ko‘rishga chaqirdi.

 

Qo‘shma bayonotda Isroilning Quddusning arab, islomiy va nasroniylik o‘ziga xosligini hamda uning huquqiy va demografik maqomini o‘zgartirishga qaratilgan siyosati qoralandi. Isroilning Al-Aqso masjidi va boshqa diniy maskanlardagi harakatlari tarixiy va huquqiy maqomni buzishga qaratilgan urinish sifatida baholandi.

 

Shuningdek, ishtirokchilar Quddusdagi nasroniy muqaddas qadamjolariga nisbatan cheklovlar, cherkovlar faoliyatiga aralashuv va ruhoniylarga qarshi hujumlarni ham qoraladi.

 

Vazirlar sentyabr oyida BMT Bosh Assambleyasining Nyu-Yorkdagi yuqori darajadagi sessiyasi doirasida Islom hamkorlik tashkiloti va Arab davlatlari ligasi tashqi ishlar vazirlarining qo‘shma yig‘ilishini o‘tkazishni ham taklif qildi. Unda Quddus va uning muqaddas qadamjolaridagi vaziyat muhokama qilinadi.