Olmaliqda Mis boyitish fabrikasining magistral quvuri yorildi
Holat yuzasidan ekologik tekshiruv o‘tkazilib, laboratoriya tahlillari boshlangan.
Olmaliq kon-metallurgiya kombinatiga qarashli Mis boyitish fabrikasining Chiqindi saqlash omboriga olib boruvchi magistral quvurida yorilish yuz berdi. Holat aks etgan videolar ijtimoiy tarmoqlarda tarqaldi.
OKMK matbuot xizmatining ma’lum qilishicha, hodisa 5-avgust kuni soat 11:55 da sodir bo‘lgan. Quvurdagi nosozlik kombinat mutaxassislari tomonidan tezkor ravishda bartaraf etilib, ta’mirlash ishlari yakunlangan.
Voqea yuzasidan Toshkent viloyati Ekologiya va iqlim o‘zgarishi bosh boshqarmasi mutaxassislari ham o‘rganish olib borgan. Boshqarmaning Atrof-muhit monitoringi, iqlim o‘zgarishi va cho‘llanishga qarshi kurashish bo‘limi (tahliliy laboratoriya) xodimlari hodisa sodir bo‘lgan hududdan tahlil uchun namunalar olgan.
Ma’lum qilinishicha, laboratoriya tahlillari yakuniga ko‘ra, aniqlangan holat bo‘yicha amaldagi qonunchilikka muvofiq tegishli choralar ko‘riladi.
