O‘zbekistonda xavfli chiqindilarini qayta ishlash darajasi 20 foizga yetkaziladi
Prezident xavfli chiqindilarni boshqarish tizimini takomillashtirishga oid qarorni imzoladi.
O‘zbekistonda xavfli chiqindilarni boshqarish samaradorligini oshirishga qaratilgan Prezident qarori qabul qilindi. Bu haqda Chiqindilarni boshqarish va sirkulyar iqtisodiyotni rivojlantirish agentligi xabar berdi.
Qayd etilishicha, hujjat ekologik xavfsizlikni ta’minlash, sanoat chiqindilarini boshqarish tizimini takomillashtirish hamda atrof-muhitga salbiy ta’sirni kamaytirishga qaratilgan qator yangi choralarni nazarda tutadi.
Qarorga muvofiq, 2030-yilgacha tog‘-kon, metallurgiya, kimyo sanoati, neft-gaz va elektr energetikasi korxonalarida hosil bo‘ladigan radioaktiv hamda I–IV xavflilik sinfiga mansub kimyoviy xavfli chiqindilarni qayta ishlash darajasi 20 foizga yetkaziladi.
Shuningdek, qayta ishlash imkoni bo‘lmagan chiqindilarni xavfsiz joylashtirish tizimini to‘liq joriy etish, ularning davlat hisobini yuritish va atrof-muhitga salbiy ta’sirini kamaytirish belgilandi.
2027-yil 1-yanvardan boshlab xavfli chiqindilar hosil qiluvchi tashkilotlar ekologik ekspertiza xulosasi asosida yillik chiqindilarni boshqarish rejalarini ishlab chiqishi shart bo‘ladi. Ular chiqindilar hajmini kamaytirish, qayta ishlash ulushini oshirish hamda chiqindilarni faqat tegishli ruxsat va infratuzilmaga ega ixtisoslashgan tashkilotlarga topshirishi lozim.
Bundan tashqari, 2026-yil 1-oktabrdan boshlab ushbu korxonalar xavfli chiqindilar bo‘yicha hisobotlarni Agentlik axborot tizimiga muntazam kiritib boradi. Mazkur talablarning bajarilishi ustidan nazoratni Ekologiya va iqlim o‘zgarishi milliy qo‘mitasining Davlat ekologik nazorat inspeksiyasi (Ekopolitsiya) amalga oshiradi.
Qaror bilan Chiqindilarni boshqarish va sirkulyar iqtisodiyotni rivojlantirish agentligi huzurida Xavfli chiqindilarni boshqarish direksiyasi tashkil etiladi. Shuningdek, Respublika radioaktiv chiqindilarni saqlash markazi Agentlik tizimiga o‘tkaziladi hamda uran merosi obyektlarini ekologik tiklash bo‘yicha vakolatli organ va operatorlar belgilandi.
Hujjatda raqamlashtirish masalalariga ham alohida e’tibor qaratilgan. 2027-yil 1-yanvarga qadar maxsus axborot tizimi ishga tushiriladi. U orqali I–III xavflilik sinfiga mansub chiqindilar uchun raqamli pasport yaratiladi va ularning hosil bo‘lishidan tortib utilizatsiya qilinishigacha bo‘lgan jarayon real vaqt rejimida monitoring qilinadi.
