Rossiyada xorijliklar soni bir yilda 8,6 foizga kamaydi

Rossiya hududida yashayotgan xorijiy fuqarolar soni 2025-yil yakunlariga ko‘ra 8,6 foizga qisqarib, 5,7 million kishini tashkil etdi. Bu haqda Rossiya Ichki ishlar vazirligi Migratsiya xizmatiga tayanib, “Vedomosti” xabar berdi.

 

Rasmiy ma’lumotlarga ko‘ra, mamlakatdagi voyaga yetmagan xorijliklar soni 24,5 foizga kamayib, 591,3 ming nafarga, xorijlik ayollar soni esa 7,6 foizga qisqarib, 1,7 million nafarga yetgan.

 

Shuningdek, xorijiy fuqarolarga berilgan vaqtinchalik yashash ruxsatnomalari soni 31 304 tani tashkil etib, bir yil avvalgiga nisbatan qariyb uchdan bir qismga kamaygan. Doimiy yashash guvohnomalari soni 27,3 foizga qisqarib, 156 229 taga, Rossiya fuqaroligini olgan xorijliklar soni esa 27,1 foizga kamayib, 152,4 ming nafarga tushgan.

 

Rossiya IIV ma’lumotiga ko‘ra, nazorat qilinadigan shaxslar reyestriga 850 mingdan ortiq noqonuniy migrant kiritilgan. Mazkur reyestrga kiritilgan shaxslarning amaldagi qonunchilikka muvofiq ayrim huquqlari cheklangan.

 

Biroq hisobotda qonuniy mehnat migratsiyasi bo‘yicha ijobiy o‘sish ham qayd etilgan. Xususan, patent yoki ishlash ruxsatnomasi asosida faoliyat yuritayotgan xorijiy fuqarolar bilan tuzilgan mehnat va fuqarolik-huquqiy shartnomalar to‘g‘risidagi xabarnomalar soni mos ravishda 25,9 foiz va 44,5 foizga oshgan.

 

Rossiya prezidenti Vladimir Putin 2025-yil oktyabr oyida 2026–2030-yillarga mo‘ljallangan migratsiya siyosati konsepsiyasini tasdiqlagan. Hujjat noqonuniy migratsiyani kamaytirish, migratsiya bilan bog‘liq huquqbuzarliklarning oldini olish va iqtisodiyot uchun malakali xorijiy mutaxassislarni jalb etishni asosiy ustuvor yo‘nalishlar sifatida belgilaydi.