O‘zbekiston Jurnalistlar uyushmasi qoshida ekologik klub tashkil etish taklif qilindi
Uyushma qoshidagi Jurnalist ayollar kengashining “Yashil iqtisodiyot va ayollar: kelajakni asrash mas’uliyati” mavzusida davra suhbati tashkil etildi.
O‘zbekiston Jurnalistlar uyushmasida “Yashil iqtisodiyot va ayollar: kelajakni asrash mas’uliyati” mavzusida davra suhbati bo‘lib o‘tdi.
Unda jurnalistlar, jamoat faollari va soha vakillari ishtirok etib, dolzarb masalalar yuzasidan fikr almashishdi, ekologik muammolarni yoritishda jurnalistlar yo‘l qo‘yayotgan kamchiliklar tahlil qilindi. Shuningdek, tadbir davomida Uyushma qoshida ekologik yo‘nalishdagi klub tashkil etish tashabbusi ham ilgari surildi.
Davra suhbatida mutaxassislar va soha vakillari ekologik muammolarni bartaraf etishda har bir fuqaroning, ayniqsa, xotin-qizlarning o‘rni va mas’uliyati alohida ahamiyat kasb etishini ta’kidladilar. Qayd etilishicha, ekologik madaniyatni shakllantirish oiladan boshlanadi. Kundalik turmushda suvni tejash, elektr energiyasidan oqilona foydalanish, chiqindilarni saralash va tejamkorlik tamoyillariga amal qilish orqali atrof-muhitni asrashga munosib hissa qo‘shish mumkin.
Tadbir davomida ro‘zg‘orda tejamkorlik madaniyatini qaror toptirish, suv resurslaridan samarali foydalanish hamda ekologik odatlarni bolalikdan singdirish masalalariga alohida e’tibor qaratildi.
Tadbir yakunida ekologik mas’uliyatni kuchaytirish, xotin-qizlarning ekologik tashabbuslarini qo‘llab-quvvatlash hamda bu borada ommaviy axborot vositalarining ishtirokini kengaytirish yuzasidan qator taklif va tavsiyalar ilgari surildi.
