Rossiyada YTH oqibatida ikki nafar o‘zbekistonlik halok bo‘ldi
Marhumlarning jasadlari sud-tibbiy ekspertizadan so‘ng O‘zbekistonga qaytariladi.
Rossiyaning Mordoviya Respublikasida o‘zbekistonliklar ishtirokida yo‘l-transport hodisasi sodir bo‘ldi. Hodisa oqibatida ikki nafar O‘zbekiston fuqarosi halok bo‘lgan, yana uch kishi jarohatlangan.
O‘zbekistonning Qozon shahridagi Bosh konsulxonasi xabariga ko‘ra, YTH 6-avgust kuni Lyambir tumanidagi Bloxino qishlog‘i yaqinida M-5 “Ural” avtomagistralining 180-kilometrida yuz bergan.
Unda “MAZ” rusumli yuk avtomobili va O‘zbekiston davlat raqamiga ega “Chevrolet Spark” avtomobili to‘qnashgan.
Hodisa oqibatida 1996-yilda tug‘ilgan A.A.P. va 1997-yilda tug‘ilgan B.Sh.A. halok bo‘lgan. Yana 2002-, 1989- va 2006-yillarda tug‘ilgan uch nafar O‘zbekiston fuqarosi turli darajadagi tan jarohatlari bilan shifoxonaga yotqizilgan.
Bosh konsulxona holatni nazoratga olgan. Marhumlarning jasadlarini sud-tibbiy ekspertiza va boshqa zarur jarayonlardan so‘ng O‘zbekistonga qaytarish ishlari Migratsiya agentligi tomonidan amalga oshirilishi ma’lum qilindi.
Jarohatlangan fuqarolarga zarur tibbiy yordam ko‘rsatilgan va ular shifoxonadan chiqarilgan.
