Wildberries kompaniyasi Rossiyani tark etib, O‘zbekistonda o‘z omborlarini ochadimi?

Oxirgi vaqtlarda Rossiyadagi Wildberries kompaniyasi omborlariga Ukraina dronlari zarba berishi oqibatida katta yo‘qotishlarga uchradi.

 

Tarmoqlarda tarqalgan xabarlarga ko‘ra, Rossiyada ombor quvvatining 20 foizi hujumlar oqibatida ishdan chiqqan. Wildberries kompaniyasi uzoq muddat saqlanadigan mahsulotlarini Belarus, Qozog‘iston va O‘zbekistonda omborlar qurib, u yerga yo‘naltirishi mumkin.

 

Xabarlarga ko‘ra, kompaniya Rossiya Federatsiya hududini tark etadi. Moscow Times nashrining yozishicha, Wildberries vakillari sotuvchilari bilan uchrashuv o‘tkazgan. Unda uzoq muddatli saqlash omborlari endilikda asosan Belarus, Qozog‘iston va O‘zbekistonda joylashishini, yetkazib berish muddatlari hamda logistika xarajatlari bo‘yicha qo‘shimcha ma’lumotlar keyinchalik taqdim etilishini bildirgan. 

 

Zamon.uz jurnalisti Shohjahon Majidov kompaniya matbuot xizmati elektron pochtasiga  mazkur savollar bilan murojaat qildi:

 

• Wildberries kompaniyasi logistika infratuzilmasining bir qismini Rossiyadan tashqariga ko‘chirish imkoniyatini ko‘rib chiqayotgani haqidagi ma’lumotlar haqiqatga to‘g‘ri keladimi?
• Kompaniya logistika quvvatlarini kengaytirish yoki Markaziy Osiyo davlatlarida, xususan, O‘zbekistonda yangi logistika markazlarini tashkil etish imkoniyatini ko‘rib chiqyaptimi?
• So‘nggi dron hujumlari kompaniyaning logistika operatsiyalari va kelgusidagi rivojlanish rejalariga sezilarli ta’sir ko‘rsatdimi?
• Wildberries logistika infratuzilmasining barqarorligini ta’minlash hamda mijozlar oldidagi majburiyatlarini uzluksiz bajarish uchun qanday choralarni ko‘rmoqda?

 

Kompaniya matbuot xizmatiga ko‘ra, ombor qurish majmualari qurilishi kompaniyaning uzoq muddatli strategiyasiga muvofiq reja asosida amalga oshirilmoqda. Kompaniya o‘zining asosiy quvvatlari Rossiya Federatsiyasi hududidan tashqariga ko‘chirishni ko‘rib chiqayotgani haqidagi ma’lumotlarni haqiqatga to‘g‘ri kelmasligini ma’lum qildi.

 

Wildberries & Rus bergan javob xatida hozirgi vaqtda kompaniya logistika jarayonlarini tiklash hamda platformaning barqaror faoliyatini ta’minlash uchun barcha zarur resurslarni safarbar etgani yozilgan.

 

“Wildberries logistika obyektlariga uyushtirilgan hujumlar oqibatida mahsulotlari zarar ko‘rgan barcha sotuvchilarni, kompaniya qaysi mamlakatda faoliyat yuritishidan qat’i nazar, qo‘llab-quvvatlamoqda. Kompensatsiya to‘lovlari bosqichma-bosqich, tranzitlar ko‘rinishida amalga oshirilmoqda va bu jarayon davom etmoqda”, deyiladi kompaniyaning Zamon.uz’ga bergan javob xatida.

 

Xatda yozilishicha, kompaniyaning O‘zbekistondagi rejalari o‘zgarishsiz qolmoqda va belgilangan reja asosida ishlar davom etmoqda.

 

“Mahalliy sotuvchilar va xaridorlar uchun infratuzilma hamda xizmatlarni rivojlantirishga qaratilgan loyihalar kompaniyaning uzoq muddatli strategiyasiga muvofiq izchil davom ettiriladi”, — deyiladi javobda.