BAA Eronni ADNOC tankeriga Hormuz bo‘g‘ozida raketa bilan zarba berishda aybladi
Hujum ortidan Fors ko‘rfazi davlatlari Eronni qoralab, bo‘g‘ozni xalqaro kemalar qatnovi uchun ochiq saqlashga chaqirdi.
Birlashgan Arab Amirliklari Eronni Abu-Dabi milliy neft kompaniyasiga (ADNOC) tegishli tankerga Hormuz bo‘g‘ozidan o‘tayotgan vaqtda raketa bilan zarba berganlikda aybladi. Hodisa oqibatida qurbonlar borligi haqida ma’lumot berilmadi. Bu haqda Al Jazeera xabar berdi.
BAA Tashqi ishlar vazirligi ma’lum qilishicha, tanker 8-avgust kuni tongda strategik suv yo‘lidan o‘tayotgan paytda nishonga olingan. Abu-Dabi hujumni Eron Islom inqilobi qo‘riqchilari korpusi tomonidan sodir etilgan “qaroqchilik harakati” deb baholadi.
BAA Tehrondan hujumlarni to‘xtatish hamda Hormuz bo‘g‘ozini to‘liq va hech qanday shartlarsiz ochishni talab qildi. Vazirlik suv yo‘lidan bosim yoki iqtisodiy shantaj vositasi sifatida foydalanish mintaqaviy barqarorlik va global energetika xavfsizligiga tahdid solishini bildirdi.
ADNOC ham kemalaridan biri bo‘g‘ozni kesib o‘tayotgan paytda raketa bilan nishonga olinganini tasdiqladi. Kompaniya kemaga yetgan zarar yoki hujum vaqtida uning aniq joylashuvi haqida ma’lumot bermadi.
ADNOC juma kuni mojaro boshlanganidan buyon bo‘g‘oz orqali o‘tayotgan 15 ta kemasiga raketa va dronlar bilan hujum qilinganini ma’lum qilgan. Ularning uchtasi shu hafta nishonga olingan. Hujumlar oqibatida bir ekipaj a’zosi halok bo‘lgan, 20 nafari yaralangan. Kompaniya ushbu hujumlar uchun javobgarlarni ochiqlamagan.
Fors ko‘rfazi hamkorlik kengashi bosh kotibi Jassim Muhammad al-Budayviy hujumni “xavfli va nomaqbul keskinlashuv” deb atadi hamda xalqaro hamjamiyatni dengiz qatnovini himoya qilish choralarini ko‘rishga chaqirdi.
Qatar Hormuz bo‘g‘ozidan bosim vositasi sifatida foydalanishga qarshi chiqib, suv yo‘lini hech qanday shartsiz ochishga chaqirdi.
Saudiya Arabistoni tankerga hujumni keskin qoralab, Eronning bunday harakatlari xalqaro huquq va BMT Xavfsizlik kengashining 2817-rezolyutsiyasini jiddiy buzishini bildirdi. Ar-Riyod Tehronni hujumlar oqibatlari uchun javobgar deb hisoblashini ma’lum qildi.
Iordaniya ham hujumni xalqaro huquqning ochiqdan-ochiq buzilishi deb baholab, BAAni qo‘llab-quvvatlashini bildirdi.
Mazkur voqea Hormuz bo‘g‘ozi atrofidagi keskinlikni yanada kuchaytirdi. BAA va Fors ko‘rfazidagi boshqa davlatlar strategik suv yo‘lining xalqaro kemalar qatnovi uchun ochiq qolishini talab qilmoqda.
