Behruz Karimov faoliyatini Shveysariyaning “Lugano” klubida davom ettiradi
18 yoshli futbolchi viza rasmiylashtirilgach, yangi jamoasi safiga qo‘shiladi.
O‘zbekiston milliy terma jamoasi va “Surxon” klubi himoyachisi Behruz Karimov faoliyatini Shveysariya Superligasi vakili “Lugano” klubida davom ettiradi. Bu haqda O‘zbekiston Professional futbol ligasi (O‘zPFL) xabar berdi.
18 yoshli futbolchi Toshkent shahrida yangi klubi uchun tibbiy ko‘rikdan o‘tgan. Shundan so‘ng Karimov “Lugano” bilan shartnoma imzolagan.
Endilikda futbolchi Shveysariyada faoliyat yuritishi uchun zarur vizani olishi kutilmoqda. Tegishli hujjatlar rasmiylashtirilgach, Karimov Shveysariyaga yo‘l oladi.
Shveysariyaning Contropiede nashri ham “Lugano” 18 yoshli o‘ng qanot himoyachisini “Surxon” safidan o‘z tarkibiga qo‘shib olganini xabar qilgan. Manbaga ko‘ra, klub transferni hozircha rasman e’lon qilmagan, biroq futbolchi shartnomani allaqachon imzolagan. “Lugano”ning rasmiy bayonoti yaqin vaqt ichida e’lon qilinishi kutilmoqda.
Behruz Karimov futbolchilik faoliyatini “Odil Junior” akademiyasida boshlagan. Yosh himoyachi 2026-yilgi Jahon chempionatida O‘zbekiston milliy terma jamoasi tarkibida ishtirok etib, Portugaliya va Kolumbiyaga qarshi uchrashuvlarda maydonga tushgan.
Karimovning “Lugano”ga transferi klubdagi o‘ng qanot himoyachisi Mattia Zanottining kelajagi borasidagi noaniqliklar fonida amalga oshmoqda. Italiyalik futbolchining boshqa klubga o‘tishi kutilmoqda.
Ayni paytda “Lugano” Shveysariya Superligasida ikki turdan so‘ng 6 ochko jamg‘arib, turnir jadvalining ikkinchi pog‘onasidan joy olgan. Musobaqa jadvalida “Young Boys” to‘plar nisbati bo‘yicha peshqadamlik qilmoqda.
