Rossiyaning yana 11 hududida migrantlar uchun “Amina” ilovasi majburiy bo‘ladi

Rossiyaning 11 hududida migrantlarning mamlakatga kirishi va hudud ichidagi harakatini nazorat qiluvchi “Amina” mobil ilovasi joriy etiladi. Bu haqda Moskva meri Sergey Sobyanin TASS bosh direktori Andrey Kondrashovga bergan intervyusida ma’lum qildi.

 

“Amina” tizimi Rossiyaga ishlash uchun keladigan vizasiz davlatlar fuqarolarining migratsiya hisobini yuritish va harakatlanishini raqamli nazorat qilish uchun ishlab chiqilgan. Ilova orqali migrantning geolokatsiyasi Ichki ishlar vazirligiga uzatiladi, shuningdek, uning amaldagi joylashuvi deklaratsiya qilingan manzilga mos kelishi avtomatik tekshiriladi.

 

Sobyaninning aytishicha, migrantlar Rossiya chegarasidan o‘tayotganda barmoq izlari va raqamli fotosuratlarini topshiradi. Ushbu biometrik ma’lumotlar asosida mamlakatga kirishi taqiqlangan yoki chegarada ushlanishi kerak bo‘lgan huquqbuzarlar aniqlanadi.

 

“Amina” tizimi dastlab Moskva va Moskva viloyatida joriy etilgan. Endilikda u yana 11 ta hududdagi yirik transport, xususan, aviatsiya uzellarida qo‘llanadi.

 

Sobyanin, shuningdek, migrantning telefonida “Amina” ilovasi ishlamasa, bu migratsiya rejimi buzilishi sifatida baholanishi va shaxs mamlakatdan chiqarib yuborilishi mumkinligini aytdi.

 

Bundan tashqari, Rossiyada migrantlarga patent berish jarayonida genetik ma’lumotlar ham to‘planayotgani ma’lum qilindi. Sobyaninning ta’kidlashicha, bu ma’lumotlardan ilgari sodir etilgan jinoyatlarni ochishda foydalanilmoqda.

 

Moskva meri yangi texnologiyalar, jumladan, videokuzatuv, sun’iy intellekt va yuzni aniqlash tizimlari poytaxtda jinoyatchilikka qarshi kurashni kuchaytirganini ta’kidladi.