Sirdaryoda Captiva va yuk mashinasi to‘qnashib, uch kishi halok bo‘ldi
Yuk mashinasi qayrilib olayotganda o‘zi bilan bir yo‘nalishdagi Captiva bilan to‘qnashgan.
Sirdaryo viloyati Xovos tumanida Captiva va Shacman rusumli transport vositalari ishtirokida yo‘l-transport hodisasi sodir bo‘ldi. Bu haqda Sirdaryo YHXB xabar berdi.
Ma'lum qilinishicha, hodisa 9 avgust kuni soat 10:30 atrofida xalqaro ahamiyatdagi M-34 avtomobil yo‘lining "Toshkent–Dushanbe" yo‘nalishi 125-kilometrida, qayrilib olish qismida yuz bergan.
Dastlabki ma’lumotlarga ko‘ra, Shacman rusumli transport vositasi qayrilib olayotgan vaqtda o‘zi bilan bir yo‘nalishda yo‘lning chap bo‘lagi bo‘ylab harakatlanib kelayotgan Captiva bilan to‘qnashgan.
YTH oqibatida Captiva haydovchisi va ikki nafar yo‘lovchi voqea joyida vafot etgan.
Holat yuzasidan Sirdaryo viloyati IIB huzuridagi Tergov boshqarmasi tomonidan Jinoyat kodeksining 266-moddasi 3-qismi “a” bandi bilan jinoyat ishi qo‘zg‘atilgan. Hozirda tergov harakatlari olib borilmoqda.
