Surxondaryoda fuqaroning uyi nega buzib tashlandi?

Surxondaryo viloyati Denov tumanida fermerning qishloq xo‘jaligiga mo‘ljallangan yer maydonida qurilgan noqonuniy uy-joy va boshqa inshootlar buzdirildi. Bu haqda Majburiy ijro byurosining Surxondaryo viloyati boshqarmasi ma’lum qildi.

 

Avvalroq ijtimoiy tarmoqlarda MIB xodimlari fuqaroning uy-joyini ogohlantirishsiz buzmoqchi bo‘lgani haqida xabarlar tarqalgan edi. Mazkur holat MIB tomonidan o‘rganilib, buzish ishlari sud hujjati asosida amalga oshirilgani aniqlandi.

 

Ma’lum bo‘lishicha, Denov tumanlararo fuqarolik ishlari bo‘yicha sudining 2025-yil 29-dekabrdagi ijro hujjatiga ko‘ra, Denov tumani “Chuqurqishloq” mahallasidagi qishloq xo‘jaligiga mo‘ljallangan sug‘oriladigan yerning 0,20 gektar qismi o‘zboshimchalik bilan egallangan.

 

Mazkur hududda qurilgan uy-joy va boshqa noqonuniy qurilmalarni buzish hamda yer maydonini dastlabki holatiga keltirish belgilangan.

 

Sud hujjati 2026-yil 24-yanvar kuni MIBning Denov tuman bo‘limi ish yurituviga kelib tushgan. Qarzdorlar sud hujjati talablarini bajarish zarurligi haqida belgilangan tartibda ogohlantirilgan.

 

Sud ajrimiga asosan ijro harakatlari ma’lum muddatga to‘xtatilgan. Keyinchalik sud ko‘rsatmasiga muvofiq ushbu to‘xtatish bekor qilinib, ijro jarayoni davom ettirilgan.

 

Qarzdorlar sud hujjati talablarini ixtiyoriy ravishda bajarmagani sababli 7-avgust kuni majburiy ijro harakatlari amalga oshirilgan. Natijada sud hujjatida ko‘rsatilgan noqonuniy qurilmalar buzilib, yer maydonini asl holatiga keltirish bo‘yicha sud qarori ijrosi ta’minlangan.

 

MIB ijtimoiy tarmoqlarda tarqalgan “fuqaroning uy-joyi ogohlantirishsiz buzilmoqchi bo‘lingan” mazmunidagi xabarlar haqiqatga to‘g‘ri kelmasligini bildirdi.