Endi bankdan 500 dollargacha valyutani pasportsiz sotib olish mumkin
Yangi tartib 9-avgustdan kuchga kirdi.
O‘zbekistonda banklardan naqd chet el valyutasini sotib olish tartibi yengillashtirildi. Endilikda jismoniy shaxslar 500 AQSH dollarigacha bo‘lgan miqdorda naqd chet el valyutasini xarid qilganda pasport, ID-karta yoki ularning o‘rnini bosuvchi boshqa hujjatni taqdim etishi talab etilmaydi.
Mazkur tartib Adliya vazirligi tashabbusi bilan qabul qilingan idoraviy hujjat — 2026-yil 8-maydagi 2886-12-sonli ro‘yxat asosida joriy etildi va 9-avgustdan kuchga kirdi.
Avval banklardan chet el valyutasini hujjatsiz sotib olish mumkin bo‘lgan limit 100 AQSH dollari etib belgilangan edi. Yangi tartib bilan ushbu miqdor 500 dollargacha oshirildi.
Adliya vazirligi mazkur o‘zgarish aholi uchun qulayliklarni kengaytirish va ortiqcha ma’muriy talablarni kamaytirishga qaratilganini ma’lum qildi.
