Tatariston prezidenti O‘zbekiston va Tojikiston prezidentlariga hamdardlik bildirdi
Nijnekamskdagi dron hujumi oqibatida O‘zbekiston va Tojikiston fuqarolari ham halok bo‘lgan edi.
Tatariston rahbari Rustam Minnixanov Nijnekamsk shahriga uyushtirilgan dron hujumi oqibatida O‘zbekiston va Tojikiston fuqarolari halok bo‘lgani munosabati bilan O‘zbekiston Prezidenti Shavkat Mirziyoyev hamda Tojikiston Prezidenti Imomali Rahmonga hamdardlik telegrammalarini yo‘lladi.
Bu haqda Tatariston rahbari matbuot xizmati xabar berdi.
Ma’lum qilinishicha, Nijnekamskdagi hujum oqibatida jami 13 kishi, jumladan, bir nafar bola halok bo‘lgan. Qurbonlar orasida O‘zbekiston va Tojikiston fuqarolari ham bor.
Minnixanov o‘z telegrammalarida halok bo‘lganlar va jarohatlanganlarning yaqinlariga zarur yordam ko‘rsatilishini ta’kidlagan.
Tatariston rahbari qurbonlarning oila a’zolari va yaqinlariga chuqur hamdardlik bildirib, og‘ir damlarda ularga sabr-toqat va matonat tilagan. Shuningdek, jarohatlanganlarning tezroq sog‘ayib ketishini tilagan.
Avvalroq 10-avgust kuni ertalab Tataristonning qator sanoat va fuqarolik obyektlariga dronlar orqali hujum qilingani xabar qilingan edi. Rasmiy ma’lumotlarga ko‘ra, hodisa oqibatida 13 kishi halok bo‘lgan, 70 dan ortiq kishi tibbiy yordamga murojaat qilgan, 21 nafar fuqaro shifoxonaga yotqizilgan.
Hodisa yuzasidan Rossiya Tergov qo‘mitasi tomonidan jinoyat ishi qo‘zg‘atilgan. Tataristonda 10-avgust motam kuni deb e’lon qilingan.
