Татаристонда дрон ҳужумидан ҳалок бўлган ўзбекистонликлар сони 8 нафарга етди
Президент Шавкат Мирзиёев топшириғига кўра, жабрланган ўзбекистонликларга ёрдам кўрсатиш, ҳалок бўлган фуқароларни олиб келиш бўйича Ҳукумат комиссияси тузилди.
10 август куни Россиянинг Татаристон Республикаси Нижнекамск шаҳрида содир бўлган дрон ҳужуми оқибатида ҳалок бўлган Ўзбекистон фуқаролари сони 8 нафарга етди. Яна бир неча нафар ўзбекистонлик турли даражадаги жароҳатлар билан шифохонага ётқизилган. Бу ҳақда Фавқулодда вазиятлар вазирлиги маълум қилди.
Вазирлик маълумотига кўра, ҳалок бўлган фуқаролар Нижнекамск ҳудудидаги қурилиш корхоналаридан бирида қурувчи бўлиб фаолият юритган.
Ҳодиса ортидан Президент Шавкат Мирзиёев топшириғига мувофиқ, Бош вазир ўринбосари Очилбой Раматов раҳбарлигида Ҳукумат комиссиясини ташкил этиш бўйича Вазирлар Маҳкамаси фармойиши қабул қилинган.
Комиссия зиммасига жароҳатланган фуқароларнинг ҳолидан хабар олиш, уларга зарур тиббий ва бошқа ёрдамларни кўрсатиш, ҳалок бўлган ўзбекистонликларни махсус авиарейс орқали Ўзбекистонга олиб келиш ҳамда марҳумларнинг яқинларига кўмаклашиш вазифалари юклатилган.
Шунингдек, Фавқулодда вазиятлар вазирлиги, Ташқи ишлар вазирлиги, Соғлиқни сақлаш вазирлиги, Миграция агентлиги ва бошқа ташкилотлар вакилларидан иборат махсус ишчи гуруҳ Россияга юборилган.
Ҳозирда Ўзбекистоннинг Қозон шаҳридаги Бош консулхонаси ва Миграция агентлиги вакиллари ҳодиса жойида бўлиб, Россия томони билан ҳамкорликда зарур чораларни кўрмоқда.
Жабрланган Ўзбекистон фуқаролари ҳақида тезкор маълумот олиш учун Қозондаги Ўзбекистон Бош консули билан +79656007979, Миграция агентлигининг Россиядаги ваколатхонаси билан эса +79257508757 ва +79251270002 рақамлари орқали боғланиш мумкин.
Аввалроқ, Нижнекамск шаҳрида 10 август куни қатор объектларга учувчисиз учиш аппаратлари орқали ҳужум уюштирилиши оқибатида 7 нафар Ўзбекистон фуқароси ҳалок бўлгани ҳақида хабар берилганди.
