Tataristonda dron hujumidan halok bo‘lgan o‘zbekistonliklar soni 8 nafarga yetdi
Prezident Shavkat Mirziyoyev topshirig‘iga ko‘ra, jabrlangan o‘zbekistonliklarga yordam ko‘rsatish, halok bo‘lgan fuqarolarni olib kelish bo‘yicha Hukumat komissiyasi tuzildi.
10 avgust kuni Rossiyaning Tatariston Respublikasi Nijnekamsk shahrida sodir bo‘lgan dron hujumi oqibatida halok bo‘lgan O‘zbekiston fuqarolari soni 8 nafarga yetdi. Yana bir necha nafar o‘zbekistonlik turli darajadagi jarohatlar bilan shifoxonaga yotqizilgan. Bu haqda Favqulodda vaziyatlar vazirligi ma’lum qildi.
Vazirlik ma’lumotiga ko‘ra, halok bo‘lgan fuqarolar Nijnekamsk hududidagi qurilish korxonalaridan birida quruvchi bo‘lib faoliyat yuritgan.
Hodisa ortidan Prezident Shavkat Mirziyoyev topshirig‘iga muvofiq, Bosh vazir o‘rinbosari Ochilboy Ramatov rahbarligida Hukumat komissiyasini tashkil etish bo‘yicha Vazirlar Mahkamasi farmoyishi qabul qilingan.
Komissiya zimmasiga jarohatlangan fuqarolarning holidan xabar olish, ularga zarur tibbiy va boshqa yordamlarni ko‘rsatish, halok bo‘lgan o‘zbekistonliklarni maxsus aviareys orqali O‘zbekistonga olib kelish hamda marhumlarning yaqinlariga ko‘maklashish vazifalari yuklatilgan.
Shuningdek, Favqulodda vaziyatlar vazirligi, Tashqi ishlar vazirligi, Sog‘liqni saqlash vazirligi, Migratsiya agentligi va boshqa tashkilotlar vakillaridan iborat maxsus ishchi guruh Rossiyaga yuborilgan.
Hozirda O‘zbekistonning Qozon shahridagi Bosh konsulxonasi va Migratsiya agentligi vakillari hodisa joyida bo‘lib, Rossiya tomoni bilan hamkorlikda zarur choralarni ko‘rmoqda.
Jabrlangan O‘zbekiston fuqarolari haqida tezkor ma’lumot olish uchun Qozondagi O‘zbekiston Bosh konsuli bilan +79656007979, Migratsiya agentligining Rossiyadagi vakolatxonasi bilan esa +79257508757 va +79251270002 raqamlari orqali bog‘lanish mumkin.
Avvalroq, Nijnekamsk shahrida 10-avgust kuni qator obyektlarga uchuvchisiz uchish apparatlari orqali hujum uyushtirilishi oqibatida 7 nafar O‘zbekiston fuqarosi halok bo‘lgani haqida xabar berilgandi.
