Toshkentda “Izzat Nazarbek” laqabli shaxs qo‘lga olindi

Toshkent shahrida tadbirkorlardan qo‘rqitish va zo‘ravonlik yo‘li bilan yirik miqdorda pul mablag‘larini talab qilganlikda gumonlangan shaxs qo‘lga olindi.

 

Maʼlum qilinishicha, huquqni muhofaza qiluvchi organlarga murojaat qilgan ikki nafar fuqaro o‘zini Izzat deb tanishtirgan shaxs va uning sheriklari tomonidan qo‘rqitish hamda bosim ostida pul mablag‘lari talab qilinganini bildirgan.

 

Murojaatchilardan birining aytishicha, undan BMW X5 avtomobili uchun 30 ming dollar, oshxona mebeli uchun esa 15 ming dollar to‘lash talab qilingan. Umumiy hisobda undan 70 ming dollar olib qo‘yilgani ma’lum qilingan.

 

Ikkinchi murojaatchi esa biznesga majburan sherik qilinganini, unga nisbatan zo‘ravonlik ishlatilgani va qo‘rqitish orqali avtomobil sotib olishga hamda jami 38 ming dollar berishga majbur qilinganini bildirgan.

 

Tergovga qadar tekshiruv davomida yana bir ayol huquqni muhofaza qiluvchi organlarga murojaat qilgan. U o‘zining shaxsiy suratlarini tarqatish bilan qo‘rqitilganini, uchrashuvga va jinsiy aloqaga majburlanganini ma’lum qilgan.

 

O‘tkazilgan tezkor tadbirlar davomida gumonlanuvchining shaxsi aniqlangan. Tergov ma’lumotlariga ko‘ra, u 1988-yilda tug‘ilgan Isoq ismli shaxs bo‘lib, “Izzat Nazarbek” laqabi bilan tanilgan. U Uchtepa tumanidagi sport zalida o‘tkazilgan tezkor tadbir davomida qo‘lga olingan.

 

Tezkor tadbir doirasida gumonlanuvchida ikki dona qurol va o‘q-dorilar saqlanayotgani aniqlangan. Ko‘zdan kechirish davomida “Baykal” rusumli ikki dona to‘pponcha, ularga tegishli o‘q-dorilar, pichoqlar va to‘pponcha g‘ilofi protsessual tartibda rasmiylashtirib olingan.

 

Hozirda holat yuzasidan Toshkent shahar Ichki ishlar bosh boshqarmasi huzuridagi Tergov boshqarmasi tomonidan Jinoyat kodeksining 165-moddasi 3-qismi “a” bandi hamda 121-moddasi 4-qismi “v” bandi bilan jinoyat ishi qo‘zg‘atilgan.

 

Gumonlanuvchiga nisbatan qamoqqa olish tarzidagi ehtiyot chorasi qoʻllangan.