“O‘zbekgidroenergo” AJ Boshqaruv raisining tadbirkorlar bilan ochiq muloqoti bo‘lib o‘tdi
Kichik va mikro GESlar qurilishiga xususiy sektorni keng jalb qilish masalalari muhokama qilindi.
11-avgust kuni Toshkent viloyatining Bo‘stonliq tumanidagi “UzHydroPower” zavodida “O‘zbekgidroenergo” AJ boshqaruv raisi Islom Abduraxmonov ishtirokida tadbirkorlar bilan ochiq muloqot o‘tkazildi.
Unda gidroenergetika sohasini rivojlantirish, kichik va mikro GESlar qurilishini kengaytirish hamda davlat-xususiy sheriklik asosida xususiy sektor ishtirokini oshirish masalalari muhokama qilindi. Tadbirda 20 ga yaqin tadbirkor, “Gidroproyekt” AJ va boshqa tashkilotlar vakillari, shuningdek, “Turonbank” mutasaddilari ishtirok etdi.
Muloqot davomida tadbirkorlarga kichik va mikro GESlar qurish uchun hudud tanlash, loyihalash, texnik yechimlarni ishlab chiqish, gidroagregat, turbina va generatorlarni tanlash hamda yetkazib berish, qurilish-montaj ishlarini tashkil etish va obyektlarni ishga tushirish jarayonlari bo‘yicha ma’lumot berildi.
Tadbirkorlarni qiziqtirgan asosiy masalalardan biri loyihalarni moliyalashtirish bo‘ldi. “Turonbank” vakillari imtiyozli kreditlardan foydalanish shartlari hamda zarur tartib-taomillar yuzasidan tushuntirish berdi.
Shuningdek, tadbirda “UzHydroPower” zavodining ishlab chiqarish imkoniyatlari taqdim etildi. Xitoyning “Zhejiang Jinlun Electromechanic Co., L.” kompaniyasi bilan hamkorlikda tashkil etilgan korxona 1 kVtdan 40 MVtgacha bo‘lgan gidroagregatlar, turbinalar va generatorlar, shuningdek, suv nasos agregatlari hamda suv omborlari uchun metall konstruksiyalar ishlab chiqaradi.
Muloqot yakunida tadbirkorlarning taklif va murojaatlari ko‘rib chiqilib, ko‘tarilgan masalalar bo‘yicha amaliy yechimlar belgilab olindi va mas’ullarga tegishli vazifalar yuklatildi.
